Një ngjarje e rëndë ka ndodhur mbrëmjen e sotme në qytetin e Shkodrës, ku gjatë një atentati me armë zjarri, mbeti i plagosur rëndë Ilmir Hajdari, 42 vjeç, i njohur si ‘Mir Vetlla’ me precedent penal të mëparshëm.
Hajdari është arrestuar për vrasjen me armë zjarri të shtetasit Indrti Bajri në 21 Tetor 2001.
Ai se bashku me Xhabir Shegajn dhe një person tjetër ekzekutuan Indrit Bajrin me automatik.
Vetë Shegaj u ekzekutua me snajpër në vitin 2015 për vrasjen e Indrit Bajrit.
Ilmir Hajdari kishte debatuar me Indrit Bajrin e në grindje e sipër kishin kërcënuar njëri-tjetrin e ishin ndarë të acaruar.
Ditën e ngjarjes, Ilmiri, pasi kishte marrë me vete edhe Xhabir Shegën e Kujtim Barbullushin, po udhëtonin me një makinë “Mercedes Benz”.
Të tre të pandehurit ishin të armatosur me armë dhe po lëviznin nga qendra e qytetit, në rrugën kryesore, në drejtim të lagjes “Partizani” (Rus).
Te kryqëzimi, pranë Shkollës së Muzikës, në trotuarin pranë restorant “Podgorica”, Ilmir Hajdari vë re Indrit Bajrin dhe ky i fundit vë re të pandehurin.
Menjëherë ata reagojnë ndaj njëri-tjetrit dhe Ilmiri ka qëlluar në drejtim të tij. Po ashtu, ndaj Bajrit kanë qëlluar Xhabir Shega e Kujtim Barbullushi, duke i shkaktuar vdekjen e menjëhershme.
