Policia e Shtetit ka dhënë informacione shtesë në lidhje me atentatin mafioz të ndodhur në fshatin Larushk të Fushë-Krujës.
Në një njoftim për mediat, bëhet me dije se si pasojë e të shtënave në drejtim të banesës së Gentian Bejtjas ka mbetur i vdekur kunati i tij Ramazan Sino 29 vjeç si dhe u plagosën 2 fëmijët e mitur të tij, 13 dhe 10 vjeç.
Ndërkaq, lidhur me ngjarjen janë ushtruar kontrolle në 3 banesa si dhe janë shoqëruar 3 persona që mund të kenë dijeni për ngjarjen.
“Në lidhje me informacionin paraprak të dhënë mbrëmë, për ngjarjen e ndodhur në oborrin e banesës së shtetasit G. B., ju bëjmë me dije se:
Ka ndërruar jetë si pasojë e plagëve të marra shtetasi R. S., 29 vjeç, si dhe janë plagosur dhe ndodhen në spital, nën kujdesin e mjekëve, dy të mitur të moshës 13 dhe 10 vjeç, (nipat e shtetasit R. S).
Me qëllim identifikimin dhe kapjen e autorit/ëve të dyshuar, shërbimet e Policisë kanë ushtruar 3 kontrolle në 3 banesa si dhe kanë shoqëruar 3 persona që mund të kenë dijeni për ngjarjen”-njofton policia./Opinion.al
