Detaje të reja kanë dalë nga vrasja e ndodhur në orët e para të ditës së sotme në Elbasan, ku mbeti i vrarë Saimir Beqiri, 51 vjeç.
Ai ishte vëllai i Gentian Beqirit, i ekzekutuar kohë më parë.
Sipas gazetës “Panorama”, bëhet fjalë për dy atentatorë që e kanë ndjekur prej disa ditësh viktimën.
Nga burime të gazetës, bëhet me dije se Saimir Beqiri, është ruajtur nga personat disa ditë më parë, dhe vetëm mëngjesin e së hënës, ai është ndjekur që kur ka dalë nga banesa në mëngjes, dhe sipas gjasave ka qenë duke shkuar në pikën e tij të karburantit.
Ajo shkruan se atentatorët lëviznin me një automjet tip “Benz Elegance” dhe ishin të maskuar me paruke. Mësohet se vetëm njëri prej atentatorëve e ka qëlluar Beqirin.
Policia ka marrë në pytje më shumë se 15 persona dëshmitarë si edhe familjarë të viktimës , për të mësuar ndonjë hakmarrje të mundshme apo ndonjë kërcënim kohët e fundit. Por ende nuk ka ndonjë informacion zyrtar se cilat ishin motivet e vrasjes së 51-vjeçarit.
