Pas vetëm 14 ditëve në krye të Kadastrës së Vlorës, drejtoresha Elona Hodaj ka dhënë dorëheqjen. Bashkë me të është larguar edhe zv/drejtori, Krenar Xhemali.
Ajo u emërua në këtë post më 24 shtator pas dorëheqjes së Alteo Nazerajt i cili qëndroi në detyrë vetëm 10 ditë. Pak ditë më parë, nga agjencia shtetërore e Kadastrës u shkarkuan katër juristë të institucionit dhe 19 zyrtarë të tjerë kanë marrë vërejtje.
Kohët e fundit janë larguar tre drejtorë nga posti i Kadastrës në Vlorë duke nxjerrë në pah problemet e thella që ka ky institucion.
Urdhrat e parë të drejtoreshës Hodaj ishin hapja e dosjeve të vjetra dhe shqyrtimi i tyre si dhe kufizimi i hyrjeve të individëve të ndryshëm në ambientet e institucionit.
Dyshohet se shkaku kryesor i dorëheqjes së saj është dosja e Jalës për të cilën vijon problematika prej gati një muaj në kadastrën e Vlorës. Gjykata Lartë ka dhënë vendim për një pronë në bregdetin e Jalës që të mos regjistrohet, duke pezulluar një vendim të Gjykatës së Apelit të Vlorës, e cila vendoste regjistrimin e kësaj prone.
Por, nga ish-drejtuesit e Kadastrës të cilët janë larguar pretendojnë se vendimi i Gjykatës së Lartë është nul, dhe nuk mund të zbatohet./Opinion.al
