Në godinën e ndërtuar 30 vjet më parë nga regjimi komunist për të zhvilluar kongreset e Partisë Komuniste do të mbahet në Tiranë nga datat 27-30 maj Asambleja Parlamentare e NATO-s.
Me këtë rast godina po rikonstruktohet. Salla kryesore, ambientet ndihmëse e deri tek ashensorët të cilët prej vitesh ishin jofunskionalë do jenë gati deri më datë 25 Maj, raporton Top Channel.
Pallati i Kongreseve do të presë 260 deputetë nga vendet anëtare të NATO-s dhe mbi 450 delegatë të tjerë nga shtete kandidate apo partnere të kësaj organizate, të cilët do të marrin pjesë në punimet e Asamblesë Parlametare të Aleancës së Atlantikut të Veriut.
Do të krijohet një perimetër sigurie përreth Pallatit të Kongreseve, ku efektivët e Gardës, me mbështetjen edhe të Policisë së Shtetit, do të kryejnë kontrolle të imtësishme për të gjithë personat që do ndjekin punimet e Asamblesë.
Sheshi Italia do të jetë i boshatisur dhe nuk do të shërbejë si parking gjatë ditëve të zhvillimit të punimeve, por do jetë tërësisht në funksion të aktivitetit dhe të 56 delegacioneve pjesëmarrëse në të.
