Në orët e para të mëngjesit forca policie kishin rrethuar godinën e Teatrit Kombëtar e cila është parashikuar nga qeveria që të prishet për tu ndërtuar një godinë e re. Por kjo nismë e qeverisë ka hasur kundërshtim të fortë nga një pjesë e madhe e komunitetit të artistëve, shoqërisë civile dhe qytetarëve të cilët nuk duan prishjen e godinës.
Rrethimi i godinës së Teatrit Kombëtar me forca policie solli një reagim nga ana e mbështetësve të teatrit të cilët kërkuan të futeshin brenda. Gjatë kësaj kohe ndodhi një përplasje mes protestuesve dhe uniformave blu, madje u raportuan të lënduar nga kjo situatë siç ishte rasti i regjisorit Edmond Budina.
Qëndresës së qytetarëve përpara teatrit ju bashkua edhe opozita, madje edhe vetë kryetari i saj Lulzim Basha.
Pas qetësimit të situatës së tensionuar, artistët dhe qytetarët arritën të çajnë kordonin e policisë dhe të hyjnë në godinën e teatrit.
Ata denoncuan gjendjen e “mjerueshme” sipas tyre në të cilën ishte lënë godina e cila prej një viti është jashtë funksioni tashmë.
Aktorja e Teatrit Kombëtar, Adriana Tolka tha se në mbështetje të kësaj kauze “duhet të rezistojmë deri në fund“.
“Ideja është që këta duan të prishin çdo gjë” u shpreh aktori Julian Deda nga brenda Teatrit duke shtuar, “shiko ku e kanë katandisur teatrin, besoj se do mbrohet si godinë, është shumë e dhimbshme si situatë e ka kaluar atë cakun e njerëzores normale.
Nga brenda godinës ku tashmë janë ngujuar një pjesë e artistëve dhe qytetarëve foli dhe kreu i opozitës Basha. I pyetur se përse vendosi të dilte në krah të artistëve të protestën e sotme Basha tha se këtë qëndrim ka patur që nga dita e parë kur është paralajmëruar prishja e godinës.
“E vendosa që ditën e parë, madje nëqoftëse ju kujtohet PD është ajo që publikoi dokumentet dhe vetëdijësoi artistët dhe qytetarët. Sot ne nuk po zaptojmë por po çlirojmë nga zaptuesit. Mesazhi që kam për aleancën (Aleanca për Teatrin) është një mirënjohje e thellë për kurajën që kanë treguar kanë vetëdijësuar të gjithë qytetarët, që banda dhe e keqja mund të munden vetëm me bashkim, kurajo dhe këmbëngulje. Dua t’ju them gjithashtu se me aktin e qëndresës për teatrin kanë frymëzuar qëndresën qytetare kudo.
Këtu nuk jemi thjeshtë për të mbrojtur këtë tempull të artit dhe të kulturës por edhe për ti dhënë fund një bande që ka për qëllim vetëm të grabisë, varfërojë dhe vjedhë shqiptarët” u shpreh Basha. /Opinion.al
