Analisti Artan Hoxha nëpërmjet një shkrimi të shkruar për Syri.net, shkruan se një grup i mirëstrukturuar trafikantësh të kanabis, e jo vetëm të kësaj droge, shqiptaro-italian, ka vendosur dy vite më parë të hapte një pistë për ulje-ngritje avionësh për transport droge, në buzë të detit, rrëzë kodrave të Ishmit, pikërisht në atë zonë tokësore dhe atë korridor ajror i ulje-ngritjeve të të gjitha linjave zyrtare të fluturimit në Rinas, që mbartin me mijëra palë sy pasagjerësh, përfshirë zyrtarë të lartë, e ku, më së shumti, kryejnë misione ushtarake e civile flota e helikopterëve, shqiptarë a të huaj.
“Ndaj, distanca e vendndodhjes së pistës së trafikut të kanabis nga rruga automobilistike apo mbulimi i saj, në këndvështrim horizontal, nga disa gëmusha është një justifikim banal për pamundësinë e identifikimit të saj nga autoritetet, njëherazi demonstrim i sigurisë së grupit të organizuar kriminal për ta hapur pistën, pa kurrfarë gajle, në bash të vendit”, thekson Hoxha.
Ndërkaq, ai nënvizon se gjithçka u projektua me kohë e në këto dimensione komplekse ndonëse në Divjakë “u kap avioni i parë me drogë”, ndonëse në 2014-tën u shkatërrua enklava kanabiste e Lazaratit dhe mafies shqiptaro-ndërkombëtare ju zhbë një biznes me xhiro 4.5 miliardë Euro, ndonëse në 2015-tën “u asgjësuan 99.2% e sipërfaqes së mbjellë me kanabis”, dhe dëmi i mafies u dyfishua, ndonëse këtë vit Rilindja “ka arritur suksese të papara në luftën ndaj drogës” duke i shkatërruar mafies “mbi 24 miliardë Euro xhiro biznesi”, vlerë kjo sa buxheti i 10 viteve të fundit, në total, të Shtetit Shqiptar. Asgjë nga këto nuk shkaktoi as ngurrimin më të vogël tek grupi në fjalë.
“Me fjalë të tjera, investim për një shërbim transporti ajror me gjasa, jo vetëm për kanabis-in e zonës qarkuese Krujë e Fushë-Krujë por shumë më gjerë se kaq, pra, në shërbim edhe të grupeve të tjera që kanë investuar në territore të tjera të vendit me të cilat duhet të ketë edhe një mirëkuptim paraprak, mirëkuptim që, veç shërbimit të transportit ajror mund të përfshijë edhe shërbimet e grumbullimit, depozitimit, ruajtjes së mallit, pse jo edhe përpunimin e tij për vaj, duke shfrytëzuar kështu avantazhet e afërsisë së zonës Krujë e Fushë-Krujë me pistën”, shkruan Hoxha.
