Deputetja më e hershme e PS-së, Arta Dade u shpreh dje mjaft kritike me Partinë për Drejtësi, Integrim dhe Unitet. “Lidhur me PDIU-në ka një tentativë për t’u zgjeruar në mënyrë artificiale edhe në zonën time. Nuk ka ekzistuar asnjëherë asnjë parti që të përfaqësojë këto interesa atje. Në mënyrë artificiale tentojnë të emërojnë drejtorë dhe sigurisht duke marrë pushtet, kërkojnë të zgjerojnë partinë”, – tha dje Dade, e pyetur në emisionin e mëngjesit në “Vizion Plus”.
“Personalisht jam kundër këtyre praktikave. Lidhur me të drejtat e tyre është e drejta e çdo force politike të ndjekë qëllime të caktuara. Sigurisht, e them edhe njëherë që shqetësimet e historisë nuk mund të na mbajnë peng për zhvillimet e mëtejshme, por duhet zgjidhur me mjetet e situatës së sotme, me mjetet e shekullit të 21-të dhe duhet t’i ndjekim, por asnjëherë ne nuk duhet që, duke abuzuar me pushtetin, duke emëruar në mënyrë artificiale individë dhe duke u kërkuar këtyre individëve që ‘na mblidhni nja 20 njerëz se do vijmë ne të bëjmë mbledhje dhe do sajojmë parti’, unë jam kategorikisht kundër”, – theksoi Dade.
Sipas saj, “kjo nuk i sjell asgjë të mirë qeverisjes dhe nuk u sjell asgjë të mirë edhe forcave të koalicionit, sepse po të marrim partinë e çamëve, ata nuk kanë qenë me ne në koalicion në 2013-ën dhe bashkëngjitja me ne, sigurisht edhe për efekte pragmatiste, sepse duhen edhe votat në parlament, por ashtu sikurse bënë në koalicionin që kishin në 2013-ën, kaq artificiale është kjo saqë edhe individë të caktuar duke ikur nga njëra parti shkojnë te tjetra, marrin ca pozicione dhe iu duket vetja që këta tani kanë një rol shumë të rëndësishëm për të luajtur”.
“Në fakt kjo praktikë artificiale e krijimit të partive nga postet që marrin në qeveri, për mua është e papranueshme dhe kjo nuk është as demokratike. Dhe këtu unë kam shqetësimin tim”, – nënvizoi Dade. E gjitha kjo analizë e Dades erdhi pasi u pyet për marrëdhëniet me Greqinë, si dhe çështjet që janë diskutuar mes dy vendeve.
“Unë besoj që ka edhe teprime. Prandaj flas në retorikë. Në takimet që unë kam qenë e pranishme këto gjëra nuk janë diskutuar kështu. Personalisht kam parë vullnet nga ana e palës greke, dhe flas për takimet që kam qenë e pranishme”, – u shpreh kryetarja e Komisionit të Jashtëm. Ajo shtoi se “ka një vullnet nga qeveria aktuale greke dhe shqiptare dhe janë krijuar grupet e punës për të zgjidhur çështjet pezull. Ne duhet të përqendrohemi për zgjidhjen e problematikave. Domosdo, problemet nuk mund të zgjidhen me instrumente që u ka kaluar koha tashmë, se të dyja vendet tona janë pjesë e konventave ndërkombëtare”.
KOALICIONI ME LSI Deputetja socialiste Arta Dade u shpreh se aleanca e PS-së dhe e LSI-së duhet të vijojë edhe në 2017-ën për të fituar zgjedhjet. Ajo lavdëroi punën e strukturave të LSIsë në fitoren e Kolonjës. “Do të jenë zgjedhje të vështira. Edhe sikur të jesh një qeveri perfekte, çdo qeveri ka konsumin e vet. Reformat kanë kostot e veta sociale. Këtu ne duhet të bëjmë shumë kujdes për të konsoliduar strukturat e partisë, gjithashtu edhe koalicionin, sepse praktikisht rezulton që edhe në Kolonjë, po të shikosh rezultatin, unë dua të falënderoj edhe LSI-në për këtë. Flas për atë pjesë të LSIsë që ka një bashkëpunim të shkëlqyer. Duhet të vazhdojmë të mbetemi kështu, në mënyrë që t’i japim Shqipërisë atë që presin shqiptarët, dhe unë besoj që opozita nga ana e saj duhet të merret me veten”, – u shpreh Dade./G.SH
