Një ngjarje tragjike ka ndodhur në Serbi, ku 9 persona u vranë nga të shtënat me armë zjarri nga një 14-vjeçar.
Policia serbe ka arrestuar babanë e Kosta Keçmanovic , i dyshuar për vrasjen e nëntë personave, mes tyre nxënës dhe një roje sigurie, ngjarje e ndodhur mëngjesin e sotëm në Shkollën “Vladislav Ribnikar”.
Siç shihet edhe në video, mediat serbe kanë regjistruar momentin kur policia ka marrë të atin nga banesa për ta çuar drejt komisariatit.
Siç njoftoi më parë policia, 14-vjeçari e ka kryer krimin me armën e të atit, i cili pretendon se ka pasur leje ligjore për armën.
Sipas informacioneve jozyrtare, të raportuara nga ministri i Policisë, Bratislav Gashiq, babai i tij ka vizituar rregullisht poligonin e qitjes, madje ka marrë me vete edhe djalin e tij.
Kujtojmë se Kosta Keçmanovic ka hyrë në shkollën e Vraçarit mëngjesin e sotëm dhe ka vrarë me armë zjarri nëntë persona, mes tyre tetë nxënës dhe rojen e shkollës.
I dyshuari më pas ka telefonuar policinë, duke u treguar se çfarë kishte bërë.
Siç njoftuan sot në një konferencë për media zyrtarë të policisë, ai e kishte planifikuar krimin për një kohë të gjatë. Madje në banesën e tij u gjet edhe një listë e personave që ai kishte planifikuar të vrasë.
Ndërkohë Serbia ka shpallur 3 ditë zie kombëtare për të nderuar viktimat e masakrës./Opinion.
