Dy shtetas kinezë janë arrestuar në aeroportin e Rinasit teksa tentuan të kalonin me pasaportë false të Koresë së Jugut.
Policia bën me dije se ne pranga kanë rënë shtetasit me iniciale J. Sh., 27 vjeç dhe Ch. Ch., 52 vjeç.
Mësohet se secili nga këta shtetas ka paraqitur pasaportë të Koresë së Jugut, të cilat pas verifikimeve rezultuan të falsifikuara.
Gjatë kontrollit fizik, këtyre shtetasve iu janë gjetur pasaportat e tyre kineze, me të njëjtat gjeneralitete si pasaportat e falsifikuara, të cilat u sekuestruan në cilësinë e provës materiale.
“Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme, për veprën penale “Falsifikimi i letërnjoftimeve, i pasaportave ose i vizave”, kryer në bashkëpunim”, njofton policia./Opinion.al
