Katër shqiptarë janë arrestuar në Londër më 13 prill, pas një hetimi të gjatë nga Agjencia Kombëtare e Krimit.
Ata janë të dyshuar si pjesë e një grupi kriminal që kryente dërgesa të parave cash nga Britania e Madhe për në Shqipëri.
Të dyshuarit u arrestuan pas një serie bastisjesh që nisi me arrestimin e një 48-vjeçari shqiptar në Dover, të cilit iu gjetën brenda furgonit të tij tip “Mercedes Sprinter” gjithsej 390,000 £ të mbështjellë në pako të ndryshme prej kallaji, të cilat kishin destinacion final Tiranën.
Shtëpia e të dyshuarit në Haringey, Londër, u kontrollua dhe oficerët zbuluan 150,000 £ të tjera.
Dy burra të tjerë, të moshës 34 dhe 22 vjeç, dhe një djalë 17-vjeçar u arrestuan më pas në Tottenham Hale, të Londrës, dhe rreth 150.000 paund u sekuestruan në një automjet të dytë.
Ndërkohë, 34-vjeçari rezultonte i arrestuar më parë në shtator 2022, kur oficerët zbuluan mbi 20,000 £ në makinën e tij.
Në gusht 2023, u sekuestruan edhe 43,980 £ të tjera, të cilat besohej se ishin të destinuara për t’u transportuar nga grupi.
