Policia e Shtetit ka dhënë informacion zyrtar për arrestimin e 45-vjeçarit shqiptar Spartak Dyrmishi, i cili akuzohet për përdhunimin e një shtetase greke dhe tentativën për përdhunim të një shtetase tjetër.
Autoritetet shqiptare bëjnë me dije se pas kërkimeve të pandërprera, në orët e vona të mbrëmjes së djeshme, strukturat operacionale të Drejtorisë Vendore të Policisë Vlorë bënë të mundur kapjen e shtetasit Spartak Dyrmishi, 45 vjeç, banues në Vlorë.
Policia thotë në një njoftim për mediat se duke qenë se 45-vjeçari shprehu dëshirën për t’u dorëzuar te pala greke, në orët e para të mëngjesit të sotëm, Policia shqiptare e ka dorëzuar atë në Pikën e Kalimit Kufitar Kakavije.
Po ashtu ka patur një komunikim në mesnatë, mes Drejtorit të Përgjithshëm të Policisë së Shtetit, Muhamet Rrumbullaku dhe Drejtorit të Përgjithshëm të Policisë greke, Gjeneral Lieutenant Konstantinos Skoumas ku u u vlerësua bashkëpunimi për arrestimin e Dyrmishit.
