Lista Serbe ka reaguar pasi arrestimit të Nenad Orloviç, i njohur me nofkat “Nemac” dhe “Rusi”, i dyshuar për përfshirje në dhunën ndaj ushtarëve të KFOR-it.
Përmes një postimi në rrjetin social në Facebook, thuhet se arrestimi i një tjetër qytetari serb ka ndodhur vetëm pak orë pas bisedimeve mes kryeministrit të Kosovës Albin Kurti dhe përfaqësuesve të lartë të Bashkimit Evropian.
Sipas reagimit të tyre, ata kërkojnë nga EULEX dhe KFOR të vendosin forcat e tyre sa më parë në veri të vendit dhe të garantojnë paqe dhe siguri për të gjithë qytetarët.
Në reagim thuhet se është detyrë dhe obligim i forcave që të mbrojnë qytetarët pavarësisht nacionalitetit të tyre.
“Një tjetër serb i nderuar Nenad Orloviq është rrëmbyer sot në vendin e punës në Kosovska Mitrovicë nga regjimi i Kurtit, vetëm pak orë pas bisedimeve të një përfaqësuesi të lartë të Bashkimit Evropian me Kurtin në Bruksel.
Arrestimet e pabazuara dhe arbitrare po përdoren si metodë e dëbimit të gjithë serbëve nga Kosova dhe Metohija, para syve të gjithë bashkësisë ndërkombëtare që me heshtjen e saj i dha hapësirë Kurtit të merret me serbët.
Nenad i cili është njeri familjar, baba i katër fëmijëve punonte me kohë të pjesshme në autolarje, për të qëndruar në Kosovë dhe Metohi dhe për të mbështetur fëmijët e tij. Arrestimi i tij vazhdon planin e Kurtit me të cilin gjysma e serbëve duhet të dëbohen e gjysma të arrestohen.
Duke pasur parasysh qëllimin për të frikësuar serbët në Kosovë dhe Metohi, sidomos në veri, kërkojmë që Eulex dhe KFOR të vendosin forcat e tyre sa më parë dhe të garantojnë paqe dhe siguri për të gjithë qytetarët, dhe në këtë mënyrë ta pengojnë Kurtin që të shkaktojë kaos dhe të udhëheqë tërësinë Ballkani në konflikte. Është detyrë dhe obligim i tyre që t’i mbrojnë qytetarët pavarësisht nacionalitetit të tyre sepse dhuna institucionale e ushtruar nga Kurti është e papërballueshme”, thuhet në reagim./Opinion.al
