Kryebashkiakia e Shkodrës Voltana Ademi ka reaguar nëpërmjet një statusi në facebook për arrestimin dhe mbajtjen në burg të 11 protestuesve të Kukësit.
Ajo është shprehur se Drejtësia duhet të dal mbi presionet politike dhe të bëjë drejtësi. Ademi shprehet se më ndalimin dhe arrestimin e protestuesve janë hapat e parë të instalimit të asaj që menduam se e lamë pas në 1990-ën.
Sipas saj Gjykata e Apelit në Shkodër është në presion të madh nga Politika por Ademi thotë se sot është rasti kur ajo duhet të dëshmojë profesionalizëm.
Kujtojmë që ditën e sotme Gjykata e Apelit në Shkodër do të jap vendimin për 11 qytetarët kuksian të cilët po mbahen në burg që pas arrestimit ditën e protestës. Seanca gjyqësorë atje do të shoqërohet me protesta të shkodranëve dhe familjarëve të të arrestuarve.
Më poshtë reagimi i plotë i Voltana Ademit.
“Drejtësia” ka rastin të tregohet e drejtë dhe të dalë mbi presionet politike
11 qytetarë të mirë kuksianë prej shumë ditësh janë padrejtësisht në burg. Ata mund të ishin shkodranë, lezhjanë, vlonjatë, korçarë sepse të gjithë po vuajmë njësoj arbitraritetin e një qeverisje që vetëm për qytetarët nuk po mendon.
Jemi në një pikë kur duan të na privojnë edhe nga e drejta për të protestuar, për të folur kur dikush po na shtrëngon lakun në fyt ditë pas dite. Është e rëndë ta pranojmë, por janë hapat e parë të instalimit të asaj që menduam se e lamë pas në 1990-ën.
Heshtja jonë, indiferenca jonë e lehtëson mbijetesën e antivlerave. Por nuk do të heshim dhe nuk duhet të heshtim.
Gjykatat shqiptare, mes tyre edhe Gjykata e Apelit në Shkodër janë nën një presion shumë të madh politik. Por pikërisht kjo gjykatë ka rastin të tregohet e drejtë, të bëjë drejtësi për 11 kuksianet, 11 shqiptarët e varfër që po përballen me burgosje të padrejtë.
E dimë se është një sfidë jo e lehtë sepse e njohim të gjithë realitetin e rëndë që na është imponuar. Por nesër Gjykata e Apelit të Shkodrës ka mundësinë të ngjallë shpresën për të gjithë shqiptarët: Drejtësia në këtë vend nuk ka vdekur!/Opinion.al
