Kreu i Grupit Parlamentar të Partisë Socialiste, Taulant Balla në një takim të zhvilluar me studentë nga qyteti i Lushnjes ka folur edhe për lëvizjet e fundit të Prokurorisë së Posaçme dhe arrestimin e ish/ministrit të Mjedisit, Lefter Koka.
Balla thekson edhe njëherë qëndrimin e selisë rozë se kushdo qoftë i akuzuari nga SPAK-u, duhet të perballet vetë me akuzën. Sipas tij, Partia Socialiste nuk i ka askujt asnjë borxh dhe i sugjeron çdo partie në Shqipëri ta ndjekë këtë qasje.
“Ju tregova studentëve se pesë vite e ca muaj më parë miratonim në Kuvend ndryshimet kushtetuese të Reformës në Drejtësi, e cila është duke dhënë rezultate të qarta, duke nisur ta transformojë drejtësinë nga themelet, nga hallkën më të kalbur të shoqërisë shqiptare, në një gur themeli të një shteti të mirëfilltë europian, ku ligji vjen përpara gjithçkaje e ku ligji i trajton të gjithë si të barabartë. E pra, sot ne socialistët jemi më shumë krenarë për votën e dhënë për Reformën në Drejtësi. Sot me rezultatet e dukshme dhe punën e SPAK-ut, të Gjykatës Kushtetuese etj., të gjithë mund të vërejnë qartë se sa e rëndësishme ishte Reforma në Drejtësi për të ardhmen e vendit tonë. Më vjen mirë që veprimet e SPAK-ut po duartrokiten. Ka qenë dhe mbetet qëndrimi i Partisë Socialiste: Kushdo qoftë i akuzuari nga SPAK-u, pa dallim partie duhet të perballet vetë me akuzën! Partia Socialiste nuk i ka askujt asnjë borxh dhe i sugjeroj çdo partie në Shqipëri ta ndjekë këtë qasje. Është reforma në drejtësi, ajo që ka vendosur Shqipërinë në rrugën e Europës! Ata që e shanë, u munduan ta pengojnë, apo që u zotuan ta çbëjnë, duhet të kërkojnë falje”, ka shkruar Balla.
