Policia e Shtetit ka dalë me informacionin e parë lidhur me arrestimin e Ibrahim Licit në Turqi.
Operacioni i koduar “Jehona” është kryer nga Policia e Turqisë, në bashkëpunim me Policinë e Shkodrës, në koordinimin e Departamentit të Policisë Kriminale dhe Departamentit për Marrëdhëniet Ndërkombëtare, në drejtimin e SPAK.
Policia bën me dije se në Turqi është vënë në pranga me qëllim ekstradimin, një 51-vjeçar i shumëkërkuar për vrasje.
Ibrahim Lici fshihej në Turqi dhe si rezultat i shkëmbimit të informacionit në kohë reale, ndjekjes dhe koordinimit të veprimeve, Policia turke ka finalizuar operacionin policor të koduar “Jehona”, gjatë të cilit është kapur dhe vënë në pranga shtetasi i shumëkërkuar Ibrahim Lici, 51 vjeç.
Gjykata e Rrethit Gjyqësor Shkodër, në vitin 2021, i ka caktuar këtij shtetasi, masën e sigurisë “Arrest në burg”, për veprat penale “Vrasja me paramendim” dhe “Mbajtje pa leje dhe prodhim i armeve shpërthyese dhe municionit”, pasi më datë 15.05.2021, dyshohet ka vrarë me armë zjarri pistoletë, shtetasin E. M.
Interpol Tirana, në bashkëpunim me agjencitë ligjzbatuese, vijon punën për ekstradimin e të shumëkërkuarit, drejt Shqipërisë./Opinion.al
