Boksieri shqiptar Arnold Gjergjaj do të ketë nesër shansin më të madh të jetës së tij, teksa në “O2 Arena” të Londrës do të duelojë ndaj ish-kampionit të botës në peshat e rënda, britanikut David Haye. Një përballje që nuk është për titullin kampion, por për Gjergjaj është një mundësi e artë për të afirmuar emrin e tij edhe pse është ende i pamposhtur në ring si profesionist (29 fitore, nga të cilat 21 janë me KO). Por përballë Haye (27 fitore dhe dy humbje si profesionist) do ta ketë të vështirë, ndoshta të pamundur të fitojë.
Gjithsesi, “The Cobra”, siç njihet shqiptari Gjergjaj, do të tentojë të bëjë mrekullinë, madje ai ka besim te forcat e tij. “Jam përgatitur mirë dhe nuk më tremb një sfidë e tillë, një stadium i tillë. Ky është shansi i madh i karrierës time dhe nuk dua të zhgënjej”, ka deklaruar boksieri shqiptar, që për herë të dytë në karrierën e tij duelon jashtë Zvicrës, ku dhe jeton. Dy boksierët kanë bërë sot në mesditë peshimet dhe daljen e fundit publike para duelit që do të zhvillohet nesër në mbrëmje në Britaninë e Madhe.
“Unë do t’i shkaktoj Gjergjajt humbjen e parë në karrierë. Do ta thyej rekordin e tij. Ai nuk e di se si është të humbasësh. Edhe pse është në kulmin e karrierës, unë do ta mund. Jam më i shpejtë se kurrë. që tani po mendoj për duelin e radhës, një sfidë për titullin kampion”, u shpreh para mediave britaniku David Haye, që u rikthye në ring janarin e kaluar, pas një pushimi gati 3-vjeçar. Haye është shprehur se do të luftojë sërish për titullin kampion bote në të ardhmen, për t’u rikthyer kampioni i padiskutuar i peshave të rënda.
