Ashtu siç ishte parashikuar, ka nisur në orën 15:00 misioni kryesor i marrëveshjes së armëpushimit mes Hamasit dhe Izraelit, që është lirimi i personave të marrë peng më 7 tetor dhe në krahun tjetër lirimi i të burgosurve palestinez, fëmijë dhe gra nga burgjet e Tel Avivit.
Dymbëdhjetë pengjet e parë që janë liruar nga Hamasi në Gaza janë të gjithë shtetas tajlandez, të marrë peng në ditën kur nisi konflikti i armatosur.
Lajmin e ka bërë të ditur kryeministri i Tajlandës, Srettha Thavisin, me një postim në platformën X.
“Është konfirmuar nga departamenti i sigurisë dhe Ministria e Punëve të Jashtme se janë 12 pengje tajlandeze të liruar tashmë”, shkroi Thavisin.
Ai shtoi se zyrtarët e ambasadës janë rrugës për t’i marrë pengjet e liruara. “Ata duhet të dinë emrat dhe detajet e tyre. Ju lutemi qëndroni të sintonizuar”, shtoi kryeministri.
Sakaq disa ambulanca janë parë duke mbërritur në bazën ajrore izraelite Hatzerim, ku priten të mbërrijnë pengjet e liruara, ndërsa mediat e qeverisë egjiptiane kanë njoftuar se Kajro zyrtare ka ndërmjetësuar një marrëveshje për lirimin e 12 pengjeve tajlandeze.
“Përpjekjet ndërmjetësuese të Egjiptit kanë sjellë lirimin e 12 pengjeve tajlandeze dhe 13 izraelitëve, përfshirë gra dhe fëmijë, të mbajtur nga Hamasi”, thuhet në një deklaratë.
Sa i përket izraelitëve, Al Jazeera referuar disa televizioneve izraelite raporton se ata janë transferuar në Kryqin e Kuq në Gaza dhe janë rrugës për në vendkalimin Rafah me Egjiptin.
Pas mbërritjes në bazën ajrore, pengjet e liruar do të fluturojnë ose do të dërgohen në pesë spitale të ndryshme në të gjithë vendin për trajtim mjekësor, sipas nevojës, kanë thënë zyrtarët izraelitë.
Ndërkohë, në këmbim rreth 39 të burgosur palestinezë, 24 gra dhe 15 djem adoleshentë, do të lirohen nga burgjet izraelite në Bregun Perëndimor.
