Linda Morina është “këngëtarja” që po prezantohet gjithnjë e më shumë ne mediat shqiptare. Një mendim të kundërt me këtë duket se ka kryeredaktorja e gazetës Zëri, Arbana Xharra e cila ka publikuar një shkrim në profilin e saj në Facebook.
Sipas saj jo çdo kush që posedon një profil të tipit “Linda Morina Official”, mund të jetë material për prezantim në media.
Më poshtë lexoni shkrimin e saj të plotë.
“Linda Morina” – shpërfaqje e patologjisë sonë shoqërore!
Ne si shoqëri kemi manifestuar tendencë të bëjmë shaka me njerëz me probleme mentale. Nëse ndonjë i tillë është takuar në rrugë, të grumbulluar rreth tij e kanë ngacmuar e shpotitur me fjalë, të cilat shpesh janë përshkallëzuar në dhunë fizike. Kjo ka qenë arsyeja pse familjet, të cilat kanë pasur fëmijë të tillë, i kanë mbajtur në izolim për të mos u përballë më situatat të tilla. Familjet me persona të tillë, madje janë privuar edhe nga martesa (jo, se e kanë një të trentë e na lind fëmija me të meta). Prandaj, vazhdojmë të mbetemi shoqëri e prapambetur skajshmërish.
Linda Morina është një prej shumë të tjerëve, të cilës i ka rënë hise të (vetë) prezantohet nëpër rrjete sociale. Ajo edhe mund të jetë rrëmbyer nga sindromi celebrity, por jo çdokush që posedon një profil të tipit “Linda Morina Official”, mund të jetë material për prezantim media.
NE jemi arsye që ajo/të tillët medializohen. Në instancë të fundit çfarë dallon ajo prej shumë fytyrave tjera publike, në politikë, media, estradë etj.
Lindën e portretizojmë ne si rast patologjik, por në fakt, Linda është shpërfaqje e patologjisë sonë shoqërore.
