Apeli i GJKKO-së la në fuqi masën “detyrim paraqitje” dhe bllokim të pasaportës për ish-kryeministrin Sali Berisha.
Në një dalje për mediat, avokati i tij deklaroi se kjo është një masë antikushtetuese. Sipas Genc Gjokutajt, Berisha nuk ka rrezik që të ikë jashtë vendit.
“Ashpërsimi i masës, është me rrezikun për ikje. Zoti Berisha nuk ka rrezik të ikë. Ai është çdo javë në Kuvend. Kjo masë detyrim paraqitje rrjedh nga një masë antikushtetuese. Sot gjykata shpalli dispozitivin”, tha Gjokutaj.
Ndërkaq, ditën e sotme Apeli i GJKKO-së vendosi të zbusë masën e sigurisë ndaj dhëndrit të Berishës Jamarbër Malltezi. Apeli i GJKKO-së vendosi masën “arrest në shtëpi”, për Malltezin duke e liruar nga qelia.
