Qeveria ka anuluar garën për tenderin e rrugës Milot-Fier, e cila u mbyll disa javë më parë me dorëzimin e ofertës nga një kompani e vetme.
Lajmi është bërë i ditur nga ministrja e Infrastrukturës, Belinda Balluku në emisionin ‘Përballë’ të gazetarit Lutfi Dervishi.
Balluku është shprehur se oferta e bërë nga kompania ishte poshtë tavanit të përcaktuar për këtë rrugë prej vlerës, 1,2 miliardë euro.
Ndërkaq, ministrja e Infrastrukturës ka njoftuar se qeveria do ta rihapë tenderin për rrugën Milot-Fier, duke rrëzuar kështu propozimin e ekspertëve për ndarjen në lote të kësaj vepre, çka sipas tyre do të përfshinte më shumë kompani dhe do të shkurtonte kostot dhe kohën e përfundimit të rrugës.
Ajo që ende nuk dihet është nëse qeveria do ta rihapë garën me të njëjtat kushte për kompanitë të cilat do të marrin pjesë apo kriteret e përzgjedhjes do të ndryshojnë.
Kujtojmë që në buxhetin 2021, të miratuar pak javë më parë në Kuvend, është parashikuar dhënia me koncesion e rrugës Milot-Fier./ Opinion.al
