Ambasada e Shteteve të Bashkuara të Amerikës ka reaguar gjithashtu për aktin normativ të qeverisë, e ashtuquajtura “paketa anti-KÇK”.
Në një deklaratë zyrtare, ambasada deklaron se mirëpret përpjekjet e qeverisë për luftën kundër krimit të organizuar por ashtu si deklarata e zyrës së BE ata nënvizojnë se masat e reja duhet të ndiqen nga institucionet e reja të Reformës në Drejtësi.
Lexo edhe: BE reagon për paketën “anti-KÇK”
“Ndërsa vazhdon zbatimi i reformave të rëndësishme të drejtësisë, Shtetet e Bashkuara mirëpresin përpjekjet e intensifikuara nga Qeveria e Shqipërisë për të parandaluar krimin e organizuar që të përdorë pasurinë e paligjshme për të minuar themelet e shtetit ligjor. Mekanizmat e përforcuar për zbatimin e ligjit duhet edhe të mbështesin institucionet e reja të drejtësisë të ngarkuara me ndjekjen penale të krimit të organizuar, edhe të harmonizohen me standardet e procesit të drejtë ligjor. Ne do të vazhdojmë ta ndjekim zbatimin e këtij ligji me interes te madh.”, shkruhet në deklaratën e Ambasadës së SHBA.
Miratimi i paketës “anti-KÇK” e cila synon të godasë korrupsionin, krimin e organizuar dhe terrorizmin u përball me kritika sa i përket strukturave të reja që ajo krijon dhe kompetencave të zgjeruara që i jep Policisë së Shtetit. Ndër të tjera ajo parashikon ndjekjen e gjyqtarëve dhe prokurorëve të cilët kanë dhënë vendime të dyshimta dhe kanë pasuri të pajustifikuara. Por sipas Reformës në Drejtësi, hetimin e magjistratëve dhe prokurorëve e ka si kompetencë ta bëjë vetëm Inspektori i Lartë i Drejtësisë. /Opinion.al
