Disa here është artikuluar nga politika e sidomos nga e djathta se Rama mbajti peng KLP-në me anë të shoqërisë civile. Pra mungonte një anëtar i këtij grupimi për të ngritur institucionit nga duhej të dilte edhe emri i Kryeprokurorit të ri.
Tani, kur mazhoranca e ka zgjedhur një kryprokuror të përkohshëm, që është Arta Marku, është zhbllokuar edhe procesi për ngritjen e Këshillit të Lartë të Prokurorisë. Në Kuvend janë paraqitur 4 kandidaturat dhe njëri prej tyre do të jetë anëtari i ri i këtij organi.
Sipas një raporti të dorëzuar në Kuvend, mësohet se kandidatët janë: Entela Baci, Mimoza Qinami, Andi Murataj dhe Alfred Balla. Nga vlerësimi në institucionin e Avokatit të Popullit, kandidatja Entela Baci (Hoxhaj) ka marrë më shumë pikë, më pas renditet Qinami, Murataj dhe në fund Balla. Seanca dëgjimore me kandidatët nga shoqëria civile u mbajt pranë Avokatit të Popullit më 20 dhjetor 2017, ndërsa tashmë këto emra i kanë kaluar parlamentit, i cili do të zgjedhë njërin prej tyre si anëtar të KLP-së.
