Me pjesëmarrjen e përfaqësuesve të Shqipërisë, Malit të Zi dhe Serbisë në Organizatën e Kombeve të Bashkuara është mbajtur një takim i nivelit të lartë, i cili ka patur në qendër Integrimin Evropian dhe “Axhendën 2030”. Takimi që organizuar nga Misioni i Republikës së Shqipërisë në Kombet e Bashkuara drejtuar nga Zëvendëskryeministrja Mesi në bashkëpunim me Misionin e Përhershëm të Zvicrës dhe UNDP-së.
Në fokus të këtij aktiviteti ishte diskutimi rreth objektivave të zhvillimit të qëndrueshëm, që gërshetojnë dimensionet ekonomike, sociale dhe mjedisore të zhvillimit në një shoqëri globale të qëndrueshme. Në kontekstin specifik të vendeve anëtare, kjo agjendë ndërvepron me procesin e integrimit në BE. Gjatë aktivitetit, të gjithë të pranishmit theksuan rolin e sinergjive midis këtyre dy proceseve.
Në fjalën e saj, zëvendëskryeministrja Mesi theksoi se integrimi në BE konsiderohet si nxitësi kryesor i reformave me ndikim të rëndësishëm në perspektivat e zhvillimit në vendin tonë dhe rajonin si tërësi.
Të pranishëm në këtë aktivitet kanë qenë Ministrja pa portofol e Serbisë, Përfaqësuesja e Përhershme e Malit të Zi në OKB, Administratori i UNDP-së Z. Achim Steiner; I Dërguari Special nga Zvicra për Zhvillimin e Qëndrueshëm Global, përfaqësues të Nivelit të Lartë nga BE, Banka Evropiane për Zhvillim dhe përfaqësues të Misioneve të Vendeve Anëtare të OKB-së etj.
Mesi konsideroi reformat për integrimin evropian, kur foli për konsolidimin e institucioneve publike që ofrojnë shërbime për qytetarët apo intensifikimin e luftës kundër korrupsionit dhe krimit të organizuar.
Pasditen e së enjtes, Mesi ka qenë në një lidhje direkte në Zërin e Amerikës ku u shpreh lidhur me disa nga ceshtjet aktuale te diskutuara gjate takimeve ne OKB.
