Analisti i njohur Andi Bushati i ka bërë një klizëm të gjatë dokumentit që Ben Blushi u ka çuar kolegëve të tij deputet në PS, ku u kujton statusin e shkelur të Partisë në plot 14 pika. Në shkrimin e titulluar “Për çfarë vlen klithma e Blushit”, Bushati rendit një sërë arsyesh pse sot Partia Socialiste që ka ndërtuar Rama, ka humbur shumë vlera nga ajo parti që shquhej për demokracinë e brendshme.
“Mes rreshtave të saj vizatohet portreti i një njeriu që nuk ka respektin më të vogël as për ligjet rregullat e përbashkëta, as për funksionimin normal të një force politike.
Po të shkohet më tej, “Kandidati” që profilizon Blushi është politikani që njohim prej 16 vjetësh. Administratori që pa pyetur askënd leu Tiranën me ngjyrën e shallvareve të tij, ashtu sikurse sot rimodeloi kryeministrinë, pa treguar se kush ideoi dhe kush e financoi këtë projekt.
Po të vazhdohet me shqetësimet e Blushit për mosrespektimin e rregullave të garës, në mend na vjen njeriu që në vitin 2000 bëri deri në fund betejën për kryebashkiak, pa hequr asnjë ditë dorë nga posti i ministrit të kulturës. Ai nuk riskoi veten në asnjë çast ashtu sikurse nuk guxoi, as në vitin 2009, kur krijoi precedentin e një force politike që nuk e përfshin kryetarin e saj në zgjedhje.
Duke e mbyllur PS-në, duke e identifikuar atë me veten, duke zbehur deri në zhbërje çdo personalitet të saj, ai jo vetëm po e çon këtë parti drejt një tipologjie berishiste, por ai po zhbalancon njëkohësisht edhe harmoninë që gjente krejt shoqëria në alternimin mes këtyre dy modeleve.
Duke e shndërruar PS në një parti të njëshit, Edi Rama po i heq shqipëtarëve mundësinë e një zgjedhjeje reale.
Pikërisht për këtë, klithma e Blushit mbi kufomën e PS-së së vjetër, nuk është thjesht një problem i socialistëve. Ajo është një alarm për shoqërinë”, shkruan Bushati.
