Importi i miellit me përqindje proteine nën standardin e lejuar ligjërisht, ka ndezur alarmin pranë autoriteteve mbi atë që konsumojnë përditë shqiptarët, bukën.
Që prej muajit Janar, Autoriteti Kombëtar i Ushqimit ka nisur kontrolle intensive pas disa zbulimeve që u bënë nga rezultatet e analizave të miellit në vitin 2017.
Nga 75 mostra të analizuara vitin e shkuar, të gjitha rezultonin me nivelin proteinik të shënuar mbi etiketë – pa probleme. Por në të vërtetë, analizat treguan një tjetër situatë. 25% e sasisë së miellit të importuar kishte si destinacion konsumin e bukës dhe 75% atë të embëlsirave, duke ndezur dyshime të forta se diçka nuk shkonte.
Për këtë, fillimisht u kryen në Janar 6 analiza në ngarkesat e importit dhe rezultuan që të gjashta të rreme.
Dyshimet janë se mielli që përdoret për embëlsirat e ka proteinën 9 % dhe jo 12.5 % sa ai për bukën, importuesit kanë futur miell që është përdorur për furrat e bukës, duke e shënuar si miell embëlsirash.
Nga kjo skemë dyshohet se janë përfituar shuma të mëdha dhe është dëmtuar edhe shëndeti i konsumatorëve.
Nisur nga kjo situatë, Drejtori i Përgjithshëm i AKU-së Agim Ismaili, firmosi në mënyrë urgjente në datën 4 Prill një urdhër për kontrollin dhe analizimin e mostrave të miellit për çdo kamion që kalon nga dy pikat kufitare, Hani i Hotit dhe Muriqani, duke qenë se Kosova dhe Serbia furnizojnë pjesën më të madhe të tregut vendas me miell.
Pas presionit të bërë, kompanitë reflektuan dhe analizat e fundit kanë dalë të rregullta, mbi nivelin 12.5% të proteinës që duhet për miellin e bukës.
Por kjo nuk ka zgjidhur përfundimisht çështje. Burime zyrtare nga Ministria e Bujqësisë thonë se edhe pse situata është përmirësuar, problem serioz mbetet gjurmimi për destinacionin e këtij produkti, sa shkon për industrinë e prodhimit të ëmbëlsirave dhe sa për furrat e bukës. Për këtë autoritetet janë duke bashkëpunuar edhe me shërbimet inteligjente.
Mungesa e proteinës në bukë i jep efektet më të forta te fëmijët dhe gratë shtatzëna, pasi zvogëlon mundësinë e rritjes së tyre dhe jep ndikim direkt në krijimin e masës trunore të fetusit. /Tv Klan
