Kreu i grupit parlamentar të Partisë Socialiste, Taulant Balla në një deklaratë për mediat ditën e sotme tha se amnistia fiskale do të miratohet. Deklarata e tij vjen pasi shefja e Fondit Monetar Ndërkombëtar, Yan Sun tha në konferencën e përbashkët me ministren e Financave, Delinda Ibrahimaj dhe Guvernatorin e Bankës së Shqipërisë, Gent Sejko se projekt-ligji për amnistinë duhet të ndryshohet nga qeveria, pasi sipas saj konsiderohet si një dëmtim për moralin tatimor.
Nga ana tjetër, Balla tha se amnistia mbështetet nga 2/3 e qytetarëve, ndërsa shtoi se deputetët duhet ta kuptojnë se ky projekt-ligj ndikon pozitivisht në ekonominë e vendit.
“Ajo që duhet të kuptojmë është që në vlerësimin tonë, ju ftoj të verifikoni mbështetjen që ekziston në publik për amnistinë fiskale, ne na rezulton nga këshillimi se më shumë se 2/3 e mbështesin një nismë të tillë. Amnistia fiskale është një domosdoshmëri që Shqipëria të kalojë në një fazë tjetër. Ajo që ne duam të bëjmë është që ti japim mundësinë, duke përjashtuar çdo të ardhur nga aktivitete kriminale dhe korruptive dhe personat e ekspozuar politikisht të lidhur me persona me rekorde kriminale. Ne do ta miratojmë amnistinë fiskalë dhe besoj se çdo deputet duhet të kuptojë që kjo është një gjë e mirë për ekonominë e vendit dhe besoj se vendimmarrje për votën në Kuvend, përveç vendimmarrjes së grupit parlamentar në Kuvend ka të bëjë për vendimmarrjen për interesat e vendit. Një gjë duhet të jetë e qartë, nëse lufta me predha dhe raketa ndodh në Ukrainë, inflacioni i luftës dhe çdo impakt tjetër i luftës ka prekur cdo qytetar. Çdo nisëm që ka për qëllim formalizmin dhe të krijojë të ardhura shtesë për financat publike është e mirëpritur. Synimi ynë është të dialogojmë me deputetët për të kuptuar se kjo është një domosdoshmëri në kontekstin e ri ekonomik ku inflacioni i luftës ka goditur”, theksoi ndër të tjera Balla./Opinion.al
