Kreu i Partisë Agrare Ambientaliste, Agron Duka është shprehur skeptik për protestën e nesërme të opozitës, megjithëse thotë se pavarësisht rezultatit do të shërbejë si një “shkundje për qeverinë”. I ftuar në studion e A2 CNN, Duka tha se:
“Pika kryesore e platformës opozitare është që të hyjmë së bashku në zgjedhjet e tjera. Kur themi për zgjedhjet e ardhshme, opozita e bashkuar në përgjithësi me ndonjë element skeptik si unë, që megjithatë jam dakort me protestën, mendohet që të rrëzohet kjo qeveri dhe të shkohet në zgjedhje lokale dhe parlamentare së bashku. Që këtu më duket e parakohshme platforma.”
Lidhur me largimin e kryeministrit Edi Rama, Duka tha se do të jetë i vështirë rrëzimi nëpërmjet protestës. “Do të isha shumë i lumtur nëse do ta bënim këtë. Por mendoj që është e vështirë që Kryeministri aktual të lejojë krijimin e një qeverie tranzitore. Do të ishte shumë mirë nëse do të bënte këtë. Protesta bëhet për deligjimitetin e kësaj qeverie të ardhur në pushtet përmes votave të vjedhura”, u shpreh Duka.
Ai ka konfirmuar se pavarësisht vendimit të Partisë Demokratike dhe LSI-së, Partia Agrare Ambientaliste do të hyjë në zgjedhje. “Sido që të vendosin, ne do të futemi në zgjedhje. Nuk do të bëjmë gabimin që bëmë në 2017-n, ku nuk u regjistruam dhe u detyruam më pas të futeshim në listat e Partisë Demokratike. Dhe sot, Partia Agrare Ambientaliste, që përfaqëson një shtresë të caktuar të shoqërisë, rezulton me 0 vota”, tha kreu i PAA Agron Duka për A2 CNN.
