Banka Europiane për Rindërtim dhe Zhvillim, në përputhje me planin e saj për rritjen e investimeve në ekonominë e gjelbër, ka bërë të ditur përmes një raporti, synimet për nxitjen e përdorimit të mbetjeve ushqimore e pijeve në Ballkanin Perëndimor.
Qasja e Tranzicionit të Ekonomisë së Gjelbër të BERZH-it e detyron Bankën të rrisë investimet e saj në ekonominë e gjelbër, deri në 40 përqind të vëllimit vjetor të biznesit deri në vitin 2020.
Shumë nga vendet ku BERZH investon, vuajnë nga një trashëgimi e përdorimit të kotë të aseteve të tyre natyrore, duke filluar nga mallrat deri te ajri, thekson raporti.
Për shembull, të merren në konsideratë mbetjet nga përpunimi komercial i ushqimit dhe pijeve. Këto mbetje shpesh shihet si mbeturina, por ato gjithashtu mund të trajtohen si burime nëse firmat përmirësojnë mënyrën e mbledhjes dhe përdorimit të tyre.
Për të eksploruar këtë potencial, BERZH, me mbështetjen e konsulencës së biznesit EK dhe me mbështetjen financiare nga Iniciativa Qendrore Evropiane (CEI), filloi një studim të përdorimeve të mundshme për nënproduktet e ushqimit dhe pijeve në Ballkanin Perëndimor.
Studimi i BERZH tregon se përmirësimet në teknologji, të cilat mundësojnë nivel më të lartë të grumbullimit të mbeturinave dhe hedhjen më të mirë të mbetjeve të caktuara, mund të rrisin përdorimin e nënprodukteve deri në 50 për qind. Sektorët e mishit në Shqipëri dhe në Bosnjë e Hercegovinë, ndërsa më të vogla se në Serbi, gjithashtu mund të përfitojnë nga përdorimi më efikas i mbetjeve.
Gjetjet paraprake tregojnë potencial të rëndësishëm në industrinë e mishit dhe të qumështit të Serbisë. Prodhimi vjetor i mishit në vend është i lartë, rreth 450,000 ton. Proceset e prodhimit gjenerojnë një sasi të madhe mbetjesh, më shumë se 120,000 ton, shumica e të cilave tashmë po përdoren, kryesisht në ushqimin për kafshë, pleh ose për karburant.
Gjithashtu, theksohet se të gjitha vendet e Ballkanit Perëndimor kanë sektorë të mëdhenj të qumështit dhe industri të konsiderueshme të përpunimit të qumështit, por vetëm pak nga qumështi i freskët në qarkullim prodhohen në industrinë e qumështit. Kjo pritet të ndryshojë në të ardhmen, me një rritje në përpunimin e qumështit.
Për sektorin e mishit dhe të qumështit, studimi i BERZH tregon se ekzistojnë mundësi për të nxjerrë një vlerë më të madhe nga përdorimi i mbetjeve, duke rritur investimet në objektet e përpunimit, menaxhimin më të mirë, teknologjitë moderne dhe sistemet e grumbullimit. Kjo do të çojë në përdorim më efikas të burimeve dhe do të ndihmojë që ekonomitë e Ballkanit Perëndimor të jenë më të gjelbërta./Monitor
