Dy punonjës të ambasadës izraelite në kryeqytetin amerikan Uashington janë vrarë, sipas Sekretares amerikane të Sigurisë Kombëtare, Kristi Noem.
Të dy u qëlluan për vdekje pranë Muzeut Hebre të mërkurën në mbrëmje (21.05.), shkroi Noem në një postim në platformën X.
Arrestohet i dyshuari
Autori i dyshuar është arrestuar, tha drejtuesja e policisë së kryeqytetit amerikan, Pamela Smith. Pas arrestimit i dyshuari thirri sloganin pro-palestinez (“Palestina e lirë”).
Dy viktimat, një burrë dhe një grua, punonjës të ambasadës izraelite sapo ishin larguar nga një eveniment në Muzeun Hebre, kur i dyshuari 30-vjeçar u afrua dhe hapi zjarr.
I arrestuari për vrasjen para të shtënave u pa duke ecur përpara muzeut dhe gjithashtu u përpoq të hynte në muze më pas. Atje ai u ndalua nga punonjësit e sigurisë së muzeut.
Reagon presidenti amerikan
Presidenti amerikan Donald Trump e dënoi ashpër sulmin. “Këto vrasje të tmerrshme në Uashington, që duket qartë se vijnë nga antisemitizmi, duhet të ndalen, tani!”, ka shkruar ai në platformën online Truth Social.
Urrejtja dhe radikalizmi nuk kanë vend në SHBA. Trump shprehu ngushëllimet e tij për familjet e viktimave. Edhe ministrja amerikane e Drejtësisë, Pam Bondi shkroi në X se ajo ishte në vendngjarje dhe se ishte një “incident i tmerrshëm me armë zjarri”. Sekretari amerikan i Shtetit Marco Rubio foli për një “akt të pacipë të dhunës frikacake, antisemitiste”.
Ai e dënon këtë “me ashpërsinë më të madhe” shkroi Rubio në X dhe se lutjet e tij janë me familjet e viktimave.
Herzog: “Akt i neveritshëm i urrejtjes”
Presidenti i Izraelit, Yitzhak Herzog u shpreh i tronditur pas vrasjes.
”Jam i tronditur nga pamjet nga Uashington, DC. Ky është një akt i neveritshëm urrejtjeje dhe antisemitizmi që mori jetën e dy punonjësve të rinj të ambasadës izraelite,” tha Herzog në një deklaratë.
Ambasadori izraelit në OKB, Danny Danon e quajti atë një “akt të urryer të terrorizmit antisemitist”. “Ne kemi besim se autoritetet amerikane do të marrin masa të rrepta ndaj atyre që janë përgjegjës për këtë akt kriminal”, shkroi Danon në një postim në X.
Incidenti vdekjeprurës ndodhi në sfondin e luftës midis Izraelit dhe militantëve islamistë të Hamasit në Rripin e Gazës.
Izraeli është nën kritika të forta ndërkombëtare për veprimet e tij ushtarake në Gaza dhe situatën katastrofike humanitare për popullsinë në zonën bregdetare kryesisht të shkatërruar./DW
