GJKKO ka dënuar me 4 vite burg Muhamet Manollarin, pasi financoi babanë e tij, Mehdi Manollari, i cili prej vitit 2013 ndodhet në Siri si pjesëtar i organizatës terroriste ISIS. Sipas vendimit të shpallur nga trupa gjykuese e përbërë nga gjyqtarët Bib Ndreca, Erjon Bani dhe Elsa Ulliri, Manollari është shpallur fajtor për veprën penale të “Kryerjes së shërbimeve dhe veprimeve me persona të shpallur”, një vepër e parashikuar nga neni 230/ç i Kodit Penal, ndërsa dënimi do të vuhet në një burg të sigurisë së zakonshme dhe do të fillojë të ekzekutohet nga momenti kur ky vendim të marrë formë të prerë.
Sipas hetimeve të kryera nga SPAK, rezulton se në vitin 2013 i riu ka kryer një dërgesë prej 864 eurosh për llogari të babait të tij, pjesë e organizatës ISIS, e listuar terroriste nga Këshilli i Sigurimit i Kombeve të Bashkuara.
Në vendim, Gjykata ka vendosur gjithashtu deklarimin si fals të një akti, i identifikuar si një dokument dërgese financiare me të dhëna të dyshimta dhe me përmbajtje të rreme, konkretisht një dërgesë me shënimin “Dërguesi A.N. – Marrësi A.A.S.”, e bashkëlidhur si provë në aktin e ekspertimit grafik. Ky dokument është urdhëruar të fshihet përfundimisht përmes procedurës së asgjësimit sipas ligjit penal në fuqi.
Njoftimi i plotë i GJKKO
Prokuroria e Posaçme kundër Korrupsionit dhe Krimit të Organizuar ka paraqitur pranë Gjykatës kërkesën me objekt: “Gjykimin e çështjes penale, që i përket procedimit penal nr. 255, të vitit 2021, në ngarkim të të pandehurit Muhamet Mehdi Manollari, i akuzuar për kryerjen e veprës penale “Kryerja e shërbimeve dhe veprimeve me persona të shpallur”, parashikuar nga neni 230/ç i Kodit Penal”.
- Gjykimi i kësaj ҫështje u zhvillua me rregullat e gjykimit të zakonshëm. Në përfundim të gjykimit, Gjykata e Posaçme e Shkallës së Parë për Korrupsionin dhe Krimin e Organizuar me trup gjykues të përbërë nga gjyqtarët Bib Ndreca, Erjon Bani dhe Elsa Ulliri, me vendimin Nr. 29, datë 15.04.2025 vendosi:
- Deklarimin fajtor të të pandehurit Muhamet Mehdi Manollari, për kryerjen e veprës penale “Kryerja e shërbimeve dhe veprimeve me persona të shpallur”, parashikuar nga neni 230/ç i Kodit Penal dhe dënimin e tij me 4 (katër) vjet burgim.
- Vuajtja e dënimit për të pandehurin Muhamet Mehdi Manollari fillon nga dita e ekzekutimit të këtij vendimi, në momentin që merr formë të prerë, dhe ky dënim të kryhet në një burg të sigurisë së zakonshme.
- Bazuar në nenin 190 dhe 391 të K.Pr.Penale, deklarimin e falsitetit të aktit konkretisht “Dërgesë Parash-KOPJA E Agjentit”, nr. ****, datë ****, ora ****, me shënimet “DËRGUESI A.N MARRËSI A.A.S”, e Unionit Financiar Tiranë sh.a (dokument i cili ndodhet bashkëngjitur Akt Ekspertimit grafik nr. 2213, datë 29.03.2024), duke urdhëruar fshirjen tërësore të këtij dokumenti me anë të asgjësimit sipas parashikimeve proceduriale.
- Bazuar në nenin 190 dhe 224 të K.Pr.Penale, provat materiale që janë: CD të Përgjimeve sipas procesverbalit datë 21.02.2024, CD të dërguara me shkresat përkatëse nga Kompanitë Celuare, Cd të dërguara nga ana e institucioneve të ndryshme dhe DVD përkatëse, mbetën pjesë e dosjes.
- Shpenzimet hetimore të llogaritura në shumën 12500 (dymbëshjetë mijë e pesëqind) lekë, dhe ato gjyqësore sipas formularit përkatës t’i ngarkohen të pandehurit.
- Kundër vendimit lejohet ankim nga palët në Gjykatën e Posaçme të Apelit për Korrupsionin dhe Krimin e Organizuar, brenda 15 (pesëmbedhjetë) ditëve nga e nesërmja e njoftimit të vendimit.
