Kryeministri Edi Rama në një dalje për mediat pasi prezantoi vendimet e marra në mbledhjen e sotme të qeverisë, u pyet nga gazetarët edhe për akuzat ndaj kreut të grupit parlamentar të Partisë Socialiste, Taulant Balla se ka kontaktuar me eksponentë të krimit në Elbasan dhe se ka qenë në një periudhë kohe në përgjim.
Rama tha se nuk merret me spekulime ndërsa shtoi se e vërteta bazohet në fakte.
“Si mund të ketë një të vërtetë përveç asaj që bazohet në fakte. Unë i besoj fakteve, nuk merrem me llafe, thashatheme, spekulime dhe i ruhem gjysmë të vërtetave se ato janë edhe gënjeshtrat më të mëdha. Nëse ka fakte, është detyra e akuzuesve që të sjellin fakte, që nga koha e Romës kështu ka qenë. Këtu ka ndryshuar trendi i civilizimit, po kjo nuk më detyron mua të hyj në këtë trend të ndryshuar. Ka shumë gjuhë sot në Shqipëri që punojnë për gënjeshtrën por unë modestisht i jam vënë në dispozicion vetëm të vërtetës dhe kuptohet s’ka një të vërtetë absulute por asaj të vërtete që unë besoj që është e vërteta e bazuar në fakte. Për të marrë nëpërgojë njerëz, për të zhgërryer e baltosur emra njerëzish, për ta katandisur në pamjen virtuale këtë vend sikur është një kënetë ku të gjithë janë të zhgërryer e të ngjyer, ka boll që e bëjnë këtë unë por unë nuk jam pjesë e kësaj kategorie”-tha Rama.
