Kreu i PD, Lulzim Basha është përgjigjur akuzave të ish-kryeministrit Sali Berisha, ku ky i thundit është shprehur shpesh herë se “Lul Brava” bashkë Ramën kanë përvetësuar 800 mijë metër katror tokë në Portin e Durrësit.
Basha foli gjatë takimit me tregtarët e Durrësit, ku ishte shoqëruar nga kandidati i PD-së për zgjedhjet e 6 marsit, Luan Hoti. Ai u shpreh se të gjitha akuzat e Berishës kundër tij janë të pavërteta, ndërsa tha se ka sharlatanë që ecin në politikë vetëm përmes gënjeshtrave.
“Projekti i Portit të Durrësit. Një nga arsyet kryesore pse sharlatanët ecin në politikë. Për shkak të një teknike që i bëjnë njerëzit të mendojnë apo të logjikojnë. I ushqejnë si fëmijët në çerdhe duke i futur lugën në gojë. Nuk logjikojnë. Është ngritur një gënjeshtër sikur PD dhe PS, unë dhe i pari i qeverisë kemi pakt për portin e Durrësit. Është gënjeshtër. Ne qëndrojmë për transparencë. Ne e konsiderojmë aferë. Ne duam të shohim 6 mld të investohen aty, jo aq sa thonë këta 3 mld. PD është pro zhvillimit të qëndrueshëm që krijon. Perspektivë të qëndrueshme dhe nuk dëmton ato asete shekullore të Durrësit që është logjistika portuale detare. Që të bëhet kjo, nuk bëhet duke sjellë një sheik. Kështu thanë dhe përpara disa vite më parë që do vijë sheiku e do ndërtojë një kullë në Bulevard”,-tha Basha.
