Ndaj Sandro Rosell, ish-presidentit të Barçës, bashkëshortes së tij, dhe 4 personave të tjerë të afërt, ka nisur procesi gjyqësor në Gjykatën Kombëtare në Spanjë. Ata akuzohen për “pastrim parash” nga të drejtat televizive dhe ato të sponsorizimit në Brazil, pasi rezulton se kanë marrë para nga ish-presidenti i Federatës braziliane të Futbollit, Ricardo Teixeira.
Për ta kërkohet një dënim me 11 vite burg dhe një gjobë prej 59 milionë eurosh.
Në qendër të hetimeve të kryera për Rosell ka qenë një marrëveshje e nënshkruar në vitin 2006 nga Teixeira, me një kompani me seli në Ishujt Kajman, për të drejtat televizive të 24 ndeshjeve miqësore të përfaqësueses braziliane. Teixeira dhe familja Rosell përfituan nga kjo kontratë 15 milionë euro, nga të cilat 6.6 milionë shkuan për llogari të Rosell e bashkëshortes së tij, ndërsa 8.4 milionë shkuan për Teixeirën. Rosell dyshohet gjithashtu se ka marrë në mënyrë të paligjshme edhe 5 milionë euro të tjera, si pjesë e kontratës së sponsorizimit të “Nike” me përfaqësuesen braziliane.
Kujtojmë se Sandro Rosell, ndodhet në paraburgim prej majit të vitit 2017, ndërkaq mësohet se procesi gjyqësor pritet të zgjasë deri në fund të muajit mars. Në vitin 2014, Rosell dha dorëheqjen nga posti i presidentit të Barcelonës, pas problemeve të shfaqura me transferimin e Neymar nga Santos në “Camp Nou”. /E.M
