Alma Saraçi është një e re shqiptare që po bën karrierë në Hollivud, si aktore dhe si skenariste. Kohët e fundit 31-vjeçarja është mediatizuar edhe në vendin tonë, pas publikimit të një seti fotosh nudo në albumin me titull “Naked in Amerika”. Në një prononcim për revistën Psikologjia, Alma e cila pëlqen të vetëquhet “e pacipë’, shpjegon se çfarë kërkon të provokojë duke pozuar e zhveshur.
“Projekti i nudizmit është në fakt një deklarim feminist dhe në këto momente po shkruaj edhe një libër, që do të ketë koleksionin e fotove, ese dhe shkrime nga eksperienca ime me shprehjen e trupit si modele për artistët dhe pastaj si aktore. Në këtë projekt po eksploroj interpretimin e trupit, sidomos të femrës, si sekzualizohet automatikisht në kulturë dhe jetë private, dhe propozoj një situatë më të hapur dhe ideale që mund të ndihmojë jo vetëm femrën në lirimin trupor, psikologjik dhe shpirtëror, por gjithashtu ofroj mundësinë të kuptojmë më mirë evolucionin e njerëzve të zhveshur apo jo, dhe mënyrat si ne kontrollojmë njëri-tjetrin dhe si mund t’i zbërthejmë pika kyçe të trupit tonë”, shprehet Alma.
Po kush është Alma Saraçi, e cila njihet me emrin e artit Alma S. Grey? Ajo e kapi ritmin e kohës, arriti t’ia dalë dhe ta bëjë ëndrrën realitet. Ishte vetëm 17 vjeçe kur la pas vendin e saj. Nga Shqipëria e jugut të Ballkanit kishte mbërritur në Qytetin e Engjëjve, për audicione teatrale edhe përpara kamerave të Hollivudit. Sot jetës i ka dhënë dimensionin e kërkuar. Një përfaqësuese e artit shqiptar e gjithaq një model udhërrëfyes për këdo zgjedh të investojë për veten nën moton “po nuk rrezikove, nuk bëhesh askush”. I ka hyrë me pasion rrugës së vështirë të filmit.
“Kinemaja amerikane nuk është shaka, por një punë rraskapitëse”, thotë Alma Saraçi me një sërë rolesh në qendrën e kinematografisë botërore, tanimë dhe producente. Në planet e saj ka për qëllim të bëjë një film edhe në Shqipëri. Të qenit femër e pashme e ndihmon në një proces krijues dhe përfaqësues sa i takon profesionit, ndërsa siç pohon ajo vetë, “pas talentit vjen bukuria”. Imazhit të saj duhet thënë se në përditshmëri nuk i kushton mjaft kujdes.
Kjo pasi grimi nuk i pëlqen shumë. “Vetëm në qoftë se jam duke shkuar për një aktivitet, për xhirime apo për të bërë një set fotografish”, thotë Alma. “Gjatë ditës jam pa grim. Më pëlqen ta lë fytyrën të pastër. Për t’i dhënë asaj pushim, plus që kjo e ndihmon lëkurën time të rigjenerohet pas ditëve të xhirimeve ku më është dashur ta ngarkoj mjaft për këto arsye. Grimi për një rol ka me të vërtetë rëndësi, ose mungesa e tij. Gjendet tek ato detaje të vogla që ju mund të zbuloni shumë duke mos thënë shumë”. Kujdes për lëkurën ka filluar të tregojë në moshën 20-vjeçare. Regjimin e ka ruajtur sipas metodave të saj, pa renduar çmendur pas qendrave.
Preferon kushtet e shtëpisë, “me përjashtim prerjen e flokëve dhe lyerjen e tyre. Kam besim të plotë të kurohem nga duart e artistit të shkëlqyer për flokët, Julio Romano”. Bashkë me imazhin, kjo është ajo pjesë e rëndësishme, pa të cilën nuk do të kishte shkëlqim dhe pamje të re në dukjet e saj. Sekreti? “Për flokët zakonisht përdor shampo natyrale, pa kimikate, e që shkon me të gjitha produktet e mia. Gjithçka pa përbërës artificialë. Me flokët e mi të rinj, në ngjyrë të kuqe, nuk kam përdorur kimikate. Balsami i dëmton ato.” Ka mbërritur në SHBA nga Elbasani. Diplomuar në shkollën e mesme Rutgers University, Nju Xhersi ku studioi një sërë degësh që kishin të bënin me biologjinë, letërsinë franceze, filozofinë etj. Mandej vendos t’i përkushtohet artit. Ka kaluar kohë në Siatëll duke punuar në teatrot vendase për të kaluar më tej në Los Anxhelos.
Ka çelur kompaninë e saj teatrore që në kolegj. Është njohëse e gjuhës shqipe, franceze, italiane dhe spanjolle. Në këtë moment është duke zhvilluar një seri televizive për internetin, ndërsa vijon turet nëpër festivale me prezantimin e dy filmave të saj të fundit që ka kompletuar: “Broken Gardenias” dhe “Reflections of Maya Rose”. “Broken Gardenias” do të jetë gjithashtu në Gjenevë, Bolonjë dhe Paris, këtë vjeshtë-dimër./ Psikologji
