Një aktor shqiptar është kapur në Angli për llogari të Belgjikës. Sebastjan Kallabaku kërkohej nga drejtësia belge për trafik njerëzish, duke rrezikuar deri në 20 vjet burg.
Ekstradimi i Sebastjan Kallabakut, u miratua nga një gjyqtar në gusht 2021 dhe u nënshkrua nga sekretarja e atëhershme e Brendshme, Priti Patel. Por ai rezulton në Britani pasi apeloi vendimin.
Sipas Sunday Express, 37-vjeçari bëri një kërkesë për lirim me kusht në Gjykatën e Magjistraturës së Westminsterit më 19 korrik, për shkak të ndalimit për aq kohë sa zgjat beteja ligjore. Mirëpo, kërkesa për të lënë paraburgimin u refuzua dhe çështja u shty deri në përfundimin e ankesës.
Gjykata dëgjoi se Kallabaku u largua nga Shqipëria në vitin 2017 për “çështje politike” dhe kaloi kohë në Belgjikë. Megjithatë, ai nuk kërkoi azil derisa mbërriti në Mbretërinë e Bashkuar.
Autoritetet belge thonë se ai është pjesë e një rrjeti të kontrabandës me njerëz dhe ka drejtuar një varkë të mbipopulluar me 30 shqiptarë nga bregdeti holandez drejt Britanisë së Madhe në vitin 2019.
Kallabaku i mohon akuzat dhe thotë se ka krijuar një jetë familjare në Britaninë e Madhe. Nuk është e qartë se kur do të finalizohet ankesa e tij kundër ekstradimit apo kërkesës për azil.
Sipas ligjit të ekstradimit të vitit 2003, pasi të ketë mbaruar procesi i apelimit, një person duhet të largohet brenda 10 ditëve. Por nga 17 korriku, janë miratuar edhe 10 zgjatje të tjera afatesh.
