Një aksion anti-drogë është zhvilluar gjatë natën në disa fshatra të Beratit, ku janë kryer kontrolle në sera, njësi shërbimi e bare.
Sipas informacioneve, Drejtoria Vendore e Policisë Berat mësohet se e ka shtrirë aksionin në fshatrat Samaricë, Drenovicë e Pobrat, fshatra të ish/njësisë administrative Kutalli në Dimal.
Në operacion kanë marrë pjesë forcat operacionale, forcat Shqiponja dhe efektivë të sektorit të antidrogës e krimit në DVP-në Berat, me qëllim goditjen e kultivimit e shitjes së lëndëve narkotike.
Si rrjedhojë e këtij operacioni, në fshatin Drenovicë është arrestuar në flagrancë me doza të kosiderueshme kokaine, gati për shitje, 19-vjeçari Haxhi Vrapi, banues në fshatin Drenovicë.
“Sekuestrohet një sasi lënde narkotike kokainë e ndarë në doza të gatshme për shitje. Specialistët për Hetimin e Krimeve të Stacionit të Policisë Dimal, në bashkëpunim me specialistët për Hetimin e Narkotikëve në DVP Berat, si rezultat i kontrolleve në të gjithë territorin e qarkut, të mbështetura nga inteligjenca policore dhe të kryera në vijim të veprimeve operacionale për megaoperacionin “Tempulli”, kanë konstatuar dhe kanë goditur një tjetër rast të shitjes në doza, të lëndës narkotike kokainë. Për këtë rast u arrestua në flagrancë shtetasi H. V., 19 vjeç, banues në Drenovicë, Dimal. Gjatë kontrollit fizik ndaj 19-vjeçarit dhe kontrollit në banesën e tij, shërbimet e Policisë gjetën dhe sekuestruan në cilësinë e provës materiale, një sasi lënde të dyshuar narkotike kokainë, të ndarë në doza të gatshme për shitje”, njofton policia.
