Grida Duma, Sekretare për Marrëdhenien me Publikun pranë Partisë Demokratike ka qenë sot e pranishme bashkë me një grup përfaqësuesisht të djathtë, në vendin ku vetëm pak ditë më parë si pasojë e një aksidenti fatal humbën jetën dy fëmijë të vegjël. Aksident që erdhi si pasojë e ndërhyrjes së paligjshme nga njerëz të veshur me pushtet në trafikndarësen e rrugës, vetëm e vetëm për ti dhënë përparësi një karburanti që ndodhet në anë të rrugës. Në statusin e saj të gjatë, Duma shkruan se e gjitha kjo “Ndodhi për shkak të interesave të pushtetit. Ndërsa qindra qytetarë përfundojnë burgjeve për një suva, për një çati, për një mur shtëpie në pronë të vetën, ky shtet, kjo qeveri, ajo ministri, ai autoritet rrugor, prej dy vitesh nuk zbatojnë një vendim gjykate për të vendosur mbrojtëset në rrugë.”
Ja statusi i plotë
Këtu humbën jetën dy fëmijë. Në këtë rrugë humbëm dy jetë, për shkak të mbrojtëseve të rrugës, të cilat mungonin. Mendoni se kjo ndodhi vetëm për shkak të mungesës së mbrojtëseve?
Absolutisht jo. Ndodhi për shkak të interesave të pushtetit. Ndërsa qindra qytetarë përfundojnë burgjeve për një suva, për një çati, për një mur shtëpie në pronë të vetën, ky shtet, kjo qeveri, ajo ministri, ai autoritet rrugor, prej dy vitesh nuk zbatojnë një vendim gjykate për të vendosur mbrojtëset në rrugë.
Përse nuk e zbatojnë?
Sepse kështu i intereson një pronari të një pike karburanti, Pilo Kerrit, ish-deputet i PS, baba i një drejtori të rëndësishëm në Ministrinë e Transporteve dhe sot e dikur ish-shef i kabinetit të Haxhinastos, i cili përdredh ligjin sipas interesave të veta.
Prokuroria ka hapur çështjen dhe ka dërguar përballë drejtësisë dy drejtorë të Autoritetit Rrugor. Por skandali është shumë më i thellë se sa kaq.
Ironia më e madhe është se pikërisht firma të cilës i intereson që mbrojtëset e rrugës të mos ekzistojnë, është e njëjta firmë që përfiton fonde publike për mirëmbajtjen e këtij aksi rruge dhe këtij segmenti rrugor. Vlera e përfitimit: Qindra miliona lek.
Emri i gjithë kësaj është i thjeshtë – krim shtetëror. Partia Demokratike inkurajon vazhdimin e punës së prokurorisë dhe institucioneve të drejtësisë. Por natyrisht kërkojmë që kjo çështje të shkojë në Tiranë, atje ku i ka rrënjët kjo aferë.
Vajzat, fëmijët që humbën jetën, ishin nisur me nënën e tyre për të takuar të atin, të cilin ky pushtet e plasi në burg për një çati që po ndërtonte pa leje. Nga ana tjetër krimi shtetëror shkon dhe ulet këmbëkryq mbi vendimin e gjykatës. Është ky krim që na shkel dinjitetin. Është ky krim që na merr jetë.
