Gazetari, Edmond Dibra, i prekur dhe në një gjendje të vështirë emocionale, ka rrëfyer detaje nga aksidenti tragjik, i ndodhur pasditen e djeshme në dalje të tunelit të Krrabës, ku u përfshi e bija dhe tre shoqet e saj, prej të cilave dy u ndanë nga jeta ndërsa një tjetër po lufton me jetën tek spitali i Traumës.
Dibra ka tregur se vajzat, Denisa Dibra, Xhaneta Qalliu dhe motra Nervida dhe Lusinda Garunja, kishin dalë për të festuar ditëlindjen e 19-vjeçares Lusinda, e cila fatkeqësisht humbi jetën, së bashku me Xhanetën.
Gazetari ka treguar si e mori lajmin e trishtë, ndërsa shtoi se e bija nuk mban mend asgjë nga përplasja por thjesht ka kërkuar shoqet e saj. Ai rrëfeu se vajza e tij kishte shumë plagë por e ka kaluar rrezikun për jetën, ndërsa kërkoi ndihmë për miken e së bijës, Nervida Garunjan, e cila ndodhet në gjendje kritike për jetën dhe ka nevojë për gjak.
“Në radhë të parë, më falni për gjendjen emocionale, nuk do ia dëshiroja një familje këtë tragjedi. Falenderoj të madhin Zot, një aksident tepër i rëndë, vajza është jashtë rrezikut për jetën, ka plagë, por është jashtë rrezikut. Vajzat njihen nga Shkodra, e ndjera kishte ditëlindjen. Nervida Garunja është në një gjendje të vështirë për jetën, InshAllah bën mrekulli. Aksidenti ishte shumë i rëndë, Shkodra jeton me hallin dhe brengën time dhe familjet që kanë humbur pjesëtarë, aksidenti ishte fatal. Denisa ka ardhur në vete në orën 5 të mëngjesit që ka komunikuar, me mua, nuk e kujton aksidentit tragjik. Kur është përmendur ka kërkuar shoqet e saj, kjo është e mirë që vajza i kujtohet pak a shumë.
Mbrëmjeve ulem me bashkëshorten për të pirë një kafe dhe po shihja orën, vajza nuk ka shans që të mos më marrë 3 herë në ditë. Fola nga ora 12, më thanë që po knaqen, do hanë drekë dhe nga ora 6 do vijnë për Shkodër. Në orën 7 them si ka mundësi që s’na ka marrë vajza, sikur më shtynte diçka. I marr në celular, më del një person. Më thotë një qytetar që vajza është jashtë rrezikut për jetën. Ishte momenti kur kishte marrë zjarrfikësit dhe kishin nxjerrë vajzën nga makina, Kam lëshuar telefonin në tokë”, rrëfen ai për Report Tv.
Në spitalin e Traumës, ai nuk është vetëm si prindi i Denisës, por edhe i Nervidës, të plagosurës tjetër, të cilën e quan si vajzën e tij. Prindërit e Nervidës nuk munden të jenë pranë saj në këto momente kritike për jetën, sepse kanë hapur dyert e mortit në Shkodër, në pritje të trupit të pajetë të vajzës tjetër të tyre, Lusindës.
“Gjendja e Nervida është kritike dhe do bëja thirrje, vajza ka nevojë për grup gjak. Kush ka mundësi të bëjë dhuratë gjaku se bëhet ndihmë për shpëtimin e saj. Njerëzit e Nervida janë në Shkodër se familja ka hapur dyer e mortit, ato janë si vajzat e mia. Janë pjesë e familjes sime. Presin trupin e të ndjesës Lusinda që është në spitalin e Elbasanit dhe kanë në Shkodër në ceremoninë mortore”, tha babai./Opinion.al
