Dashamir Xhika vazhdon të heshtë për skandalin që ka përfshirë atë si drejtor të Autoritetit Rrugor Shqiptar, që e sheh të implikuar në një aksident rrrugor që u mori jetën dy fëmijëve.
Televizioni Klan zbuloi se ai ka refuzuar të zbatojë prej 2 vjetësh një vendim të formës së prerë të Gjykatës Administrative të Apelit për të vendosur metalike anësore në vendin ku ndodhi aksidenti, të shtunën e kaluar.
Vendim me numër 2634 është dhënë më 1 Korrik 2014 nga gjyqtarët Valdete Hoxha, Ilir Toska e Edlira Petri.
Por Dashamir Xhika nuk e ka zbatuar atë, edhe pse ka qenë Autoriteti Rrugor Shqiptar që e ka dërguar çështjen në Gjykatën Administrative të Apelit.
I pyetur mbi arsyet e moszbatimit të vendimit të formës së prerë të gjykatës, drejtori Xhika tenton t’i shmanget përgjegjësisë.
Prokuroria e Kavajës po e heton Dashamir Xhikën pikërisht për faktin se ai ka mbajtur peng në shkelje të ligjit një vendim gjykate për vendosjen e mbrojtësëve metalike si element të domosdoshëm të sigurisë rrugore. Organi i akuzës e sheh atë si përgjegjës për aksidentin rrugor me dy viktima dhe dy të plagosur.
Në lidhje me barrierat mbrojtëse të autostradës Plepa – Golem ai është kallëzuar në prokurori edhe nga Kontrolli i Lartë i Shtetit.
KLSH thotë se Dashamir Xhika ka favorizuar në mënyrë të qëllimshme subjektet private të kontraktuara për ndërtimin e rrugës By Pass Plepa – Kavajë – Rrogozhinë, duke miratuar kërkesën e tyre për ndryshimin e tipit të parmakëve mbrojtës.
Auditi i Kontrollit të Shtetit thekson se “Nëpërmjet këtij ndryshimi në specifikimet teknike të parmakëve mbrojtës të këtij aksi rrugor, ka cënuar me ndërgjegje sigurinë rrugore të këtij aksi, çka përbën një shkelje flagrante të misionit dhe funksionit kryesor të këtij institucioni”.
Auditimi i kryer për periudhën Janar 2014 – Shtator 2015 ka zbuluar gjithashtu se Dashamir Xhika i ka shkaktuar shtetit një dëm prej 634 milionë lekë ose 4.5 milionë eurosh shtetit, nga mungesa e supervizimit gjatë zbatimit të projekteve në infrastrukturën rrugore. /Tv Klan
