Një makinë ka dalë nga rruga mbrëmjen e sotme në fshatin Bajkaj të Delvinës. Mësohet se makina drejtohej nga një i mitur, ndërsa pasagjerë ndodheshin edhe dy persona të tjerë.
Për pasojë, të miturit A.D-14 vjeç. F.H-13 vjeç dhe E.K-14 vjeç, kanë mbetur të plagosur njëri prej të cilëve në gjendje të rëndë shëndetësore.
Në vendin e ngjarjes kanë shkuar forcat e rendit si dhe një ambulancë, e cila ka transportuar minorenët në urgjencën e spitalit të qytetit. 14-vjeçari me iniciale A.D., është në gjendje më të rënduar shëndetësore dhe sipas bluzave të bardha, është i intubuar ndërsa dyshohet për goditje të rëndë në kokë.
“Rreth orës 19:25, në afërsi të fshatit Bajkaj, Delvinë, dyshohet se një shtetas i mitur, duke drejtuar një automjet tip “Benz”, ka humbur kontrollin mbi drejtimin e tij dhe automjeti ka dalë nga rruga. Si pasojë e aksidentit janë dëmtuar shtetasi që dyshohet se drejtonte automjetin dhe 2 shtetas të tjerë të mitur që udhëtonin në automjet (të moshave 13-15 vjeç), të cilët janë transportuar në spital dhe ndodhen në kujdesin e mjekëve. Policia ka bllokuar automjetin, i cili dyshohet se është në pronësi të babait të njërit prej shtetasve të mitur. Grupi hetimor po punon për sqarimin e rrethanave të aksidentit”, sqaron Policia.
