Seanca e sotme plenare në Kuvendin e Shqipërisë është shoqëruar me debate mes deputetes së opozitës Greta Bardeli dhe Ministres së infrastrukturës, Belinda Balluku. Temë diskutimi ka qenë segmenti Thumanë-Kashar.
Gjatë fjalës së saj deputetja Bardeli ngriti si shqetësim traun që do të vendoset në aksin Thumanë-Kashar ku qytetarët pas përfundimit të rrugës do të paguajnë 2.5 euro, për të kaluar në rrugë.
Ndërkohë Balluku iu përgjigj se nuk do të ketë në asnjë rrugë tra, nëse nuk do të ketë rrugë alternative.
“Taksimi në rrugë nuk është një gjë e re, ajo do të funksionojë njëlloj si në çdo vend tjetër të BE-së. Ju kujtoj se qeveria shqiptare është zotuar që asnjë rrugë nuk do të ketë tra, në rast se nuk do të ketë një rrugë alternative”, tha Balluku.
