Ministri i Financave, Arben Ahmetaj, të martën, në Komisionin e Ekonomisë ka publikuar shifrat për dëmshpërblimin që i kanë bërë ish-të përndjekurve.
Ahmetaj tha se nëpërmjet këstit të nëntë, qeveria do të mbyllë pjesën e kategorisë parësore, pra ata që kanë vuajtur drejtpërsërdrejti dënimin.
Ai tregon se ka pasur një debat të gjatë edhe në Parlament se çfarë ka ndodhur me ish-të përndjekurit politik, ku edhe ndau disa shifra për të treguar se çfarë ka ndodhur me ish-të përndjekurit.
“Po të vini re në vitet elektorale 2009 dhe 2013, ish-qeveria ka tentuar të përdorë buxhetin e shtetit me emocione elektorale ndaj këtij grupi. Në 4 vjet janë shpërndarë 7.9 mld, që nga 2014 deri në 2018”,-citohet nga fjala e tij në Komision.
Sipas tij, sa i përket kategorisë parësore, në periudhën 2009-2013 kësaj kategorie i janë dhënë 1.5 mld lekë, ose 15 mln dollarë në 4 vite. 2014-2018 kategorisë parësore i janë dhënë 7.07 mld lekë, pra 70 mln dollarë.
“Ky krahasim tregon kujdesin që kjo mazhorancë ka edhe ndaj kësaj ketegorie që ka vuajtur në regjimin komunist. Shifrat janë kokëforte, të thata për të treguar edhe të vërtetën e atij debati politik se cfarë i bën njëra palë kësaj kategorie dhe cfarë i bën pala tjetër. Ata që dikur kanë mbajtur flamurin se i kanë mbështetur këtë kategori, atyre që kanë vuajtur drejtpërdrejt i kanë dhënë 15 mln dollar”, –tha Ahmetaj.
Më tej, ministri theksoi se deri më sot, brenda mandatit të parë të qeverisë kanë marrë 70 mln dollarë, duke plotësuar më pas se ndryshimi i dytë që paraqesin në ligj është ndryshimi i raportit mes parësorëve, 70 me 30, për t’i dhënë përparësi parësorëve.
Ai tha se qeveria do vazhdojë për të paguar të gjithë kategorinë parësore./Opinion.al/
