Një goditje e madhe ndaj arkës së CIA-s: një agjent është akuzuar se ka marrë qindra shufra ari në posedim të agjencisë dhe i ka fshehur në banesën e tij në Virxhinia. Vjedhja ka çuar në arrestimin e tij.
Është një histori që ende ka shumë të panjohura, dhe jo vetëm për shkak të boshllëqeve të krijuara nga agjenti. Ka ende aspekte që duhen shpjeguar. Hetimet kanë konstatuar se David Rush ka lëvizur midis nëntorit dhe marsit një sasi të madhe ari: shufrat me peshë rreth një kilogram secila janë vendosur në shtëpi së bashku me shuma parash dhe 35 orë, shumica Rolex. Sipas një vlerësimi fillestar, vlera e tyre arrin në 40 milionë dollarë. Por është e mundur që kjo të jetë vetëm një pjesë, pasi autoritetet federale besojnë se agjenti mund të ketë fshehur ar edhe në vende të tjera ende të pazbuluara.
Rush, sipas Washington Post, kishte punuar në Divizionin Teknik të inteligjencës, seksioni që prodhon pajisje të sofistikuara për aktivitetet e spiunazhit, materiale ‘të veshura’ nga rregulla të rrepta sigurie. Sipas informacionit të publikuar, është e mundur që ai të ketë arritur të marrë në dorë thesarin pikërisht për shkak të rolit të tij.
Megjithatë, nuk është e qartë për çfarë përdoreshin shufrat e arit dhe është e pashpjegueshme si askush nuk e vuri re në kohë çfarë po ndodhte. Një situatë mjaft serioze duke marrë parasysh pozicionin e zyrtarit dhe fushën operative. Gjatë hetimeve u zbulua se Rush kishte gënjyer për kredencialet e tij kur aplikoi për t’u rekrutuar në CIA: ai ishte shtirur si pilot i Marinës dhe se kishte përfunduar studime universitare. Verifikimet, të kryera vetëm më vonë, zbuluan gënjeshtrat.
Shtrohet pyetja pse kontrollet nuk u bënë në momentin e punësimit në shërbimin e inteligjencës. Në fakt, ky është një problem që është shfaqur edhe në raste të tjera që kanë përfshirë ushtarakë në veprime kriminale./Corriere della Sera
