TIRANË- Në muajin shtator, për herë të parë u përmend emri i Ilir Metës për aferën CEZ-DIA. Rrjeti i Gazetarëve Investigativ të Ballkanit shkruante se Ilir Meta ka marrë rryshfet nga Kastriot Ismailaj. Dhe për këtë BIRN i referohej burimeve nga avokatët që mbronin qeverinë shqiptare në gjyqin e arbitrazhit.
Zyra ligjore Clifford Chance (që përfaqëson qeverinë në gjyq) pretendon se Meta ka qenë një nga përfituesit e pagesave prej miliona eurosh, të përfituara nga kompania e mbledhjes së borxheve prej CEZ Shpërndarje gjatë viteve 2010 dhe 2011.
Sipas dokumentit të hartuar nga Clifford Chance, DIA përfitoi 1.48 milionë euro në 2010 nga CEZ Shpërndarje për një raport të pavlerë për identifikimin e borxhit të kompanisë. Kjo pagesë besohet se u përfitua nga DIA për të influencuar një vendim të ERE për uljen e çmimit me të cilin KESH ia shiste energjinë elektrike CEZ.
Arbitrariteti i vendimit të marrë nga ERE vlerësohet t’i ketë kushtuar furnitorit publik të energjisë elektrike, dhjetëra miliona euro në humbje, të cilat janë mbuluar nga buxheti i shtetit.
Sipas dokumentit të protokolluar nga Clifford Chance në gjykatën e arbitrazhit më 30 qershor 2015; DIA ka përfituar në total 4.5 milionë euro nga CEZ Shpërndarje, gjatë një periudhe gati një vjeçare nga Nëntori 2010 deri në Tetor 2011. Në fakt në dokumentin e Clifford Chance citon: “Një ish kryeministër i proceduar për korrupsion”, por BIRN dhe më pas gjithë mediat shkruajtën se bëhet fjalë për Ilir Metën nisur nga fakti se Meta është i vetmi ish-kryeministër që është hetuar për korrupsion.
Sapo doli shkrimi i BIRN (shtator 2015) reagoi menjëherë lideri demokrat Lulzim Basha. Asokohe Basha ka kërkuar dorëheqjen e kryetarit të Parlamentit. “Meta duhet të lërë postin dhe të hetohet si qytetar i thjeshtë, sepse hetimi mund të zbulojë skemën më të madhe të korrupsionit në Shqipëri”, është shprehur Basha.
“Firma u krijua për të mbledhur borxhet e CEZ-it, ndaj duhet të nisë hetimi ndaj Ilir Metës, – theksoi Basha. – Avokatët e qeverisë kanë zbuluar se miku i Metës ka përfituar miliona euro. Firma ka përfituar miliona euro dhe i ndante me Ilir Metën. Ky është një mashtrim dhe një korrupsion i pastër”, pati deklaruar Basha.
