Malpensa, aeroporti më i madh i Milanos dhe i dyti më i ngarkuar në Itali, do të marrë emrin e ish-kryeministrit të ndjerë, Silvio Berlusconi.
Matteo Salvini, zëvendëskryeministri i Italisë, njoftoi ndryshimin në mediat sociale, duke shkruar:
“Silvio Berlusconi ka bërë historinë e këtij vendi dhe është e drejtë t’i vihet emri i aeroportit të Malpensas pas tij”.
Është vetëm çështje kohe, së shpejti do të mund të fluturojmë nga “Silvio Berlusconi”.
Aeroporti i Milan Malpensa-s, siç është kërkuar një vit më parë nga Rajoni i Lombardisë, në fakt do të emërohet zyrtarisht me emrin e ish-kryeministrit të Forza Italia.
Berlusconi, vdiq në qershor të vitit të kaluar në moshën 86-vjeçare. Ai u zgjodh tri herë kryeministër dhe shërbeu për gjithsej nëntë vjet, më shumë se kushdo tjetër. Por vendimi për të riemërtuar aeroportin për nder të tij, ka hasur në zemërimin e disa italianëve.
