Policia turke ka arrestuar një mësues, pasi akuzohet për shpërdorim detyre dhe abuzim seksual me tetë nxënës meshkuj të tij.
Lajmi i publikuar nga “Hyrriet”, bën fjalë për ngjarjen e ndodhur në krahinën qendrore të Karamanit, ku mësuesi, i identifikuar si Muamer B., jepte kurse private për nxënësit në apartamente me qira të marra në emër të degës së Fondacionit Ensar.
Ai u arrestua më 13 mars pas pretendimeve se 54vjeçari kishte abuzuar seksualisht me tetë prej nxënësve të tij meshkuj në këto apartamente. Numri i djemve të mitur që dyshohet se i janë nënshtruar abuzimit seksual nga Muamer B. thuhet se është tetë, por pritet që ky numër të rritet pas hetimeve që kanë nisur autoritetet turke. Muamer B. thuhet se ka lindur në një fshat në Karaman, është divorcuar tri herë dhe ka një fëmijë.
Ai ishte duke punuar për shkollën fillore Gazi Mustafa Kemal për tre vitet e fundit dhe është raportuar se jepte edhe kurse private./Panorama
