Miliarderi rus Roman Abramovich konfirmoi përmes një postimi të gjatë në rrjetet sociale se do të shesë klubin e Chelsea, duke premtuar se do t’i dhurojë të ardhurat neto në një fondacion bamirësie për viktimat e luftës në Ukrainë.
“Kjo përfshin sigurimin e fondeve kritike për nevojat urgjente dhe të menjëhershme të viktimave si dhe mbështetjen e rimëkëmbjes”, tha Abramovich në një deklaratë.
Abramovich, i cili ka mohuar lidhjet e ngushta financiare me presidentin rus Vladimir Putin, por është vënë nën kontroll të shtuar ditët e fundit, thotë se shitja e klubit nuk do të bëhet me shpejtësi.
Ai shprehet se nuk do të kërkojë shlyerjen e huave prej 1.5 miliardë paundësh që i ka dhënë klubit.
