Dje u publikua spoti i LGBT për familjen. Duket se në vend të dy burrave që puthen buzë më buzë e rrisin një fëmijë, e kanë menduar më të përtypshme figurën e dy grave në atë rol. Shihe një herë këtë spot duke klikuar mbi imazhin e vazhdojmë:
Edhe kjo pikë e projektit Soros për Shqipërinë po vihet në jetë. Satrapët e tij në drejtimin e vendit tonë po ia dalin të ndyshojnë kushtetutën e vendit, duke hequr nga kodi i familjes përcaktimin e martesës si lidhje mes një burri dhe një gruaje.
Nuk po flasim për opozitën këtu. Kur ende s’po zgjohet për çështjet e bukës së gojë, burgut, jetës a vdekjes, si zorr ta mendosh të dalë kundër. Për të mos thënë të kundërtën.
Fjala është për ato institucione që i kanë dalë për zot temave të tilla. Në krye të tyre – institucionet fetare. Kush reagoi prej tyre?…
VETËM KISHA KATOLIKE!!!
As për qejf e as për inat. Por për themelet mbi atë që është ngritur dhe ekziston. Në librat e shenjtë kjo është një çështje shterruese e nuk le vend për interpretim. Dhe pikërisht mbi këto ligje e parime mbështetet edhe qëndrimi i Kishës Katolike për këtë ndryshim drastik në legjislacionin shqiptar, ndryshim që ende nuk kanë guxuar ta kryejnë as vende shumë më liberale se ne.
PO PSE, VETËM KATOLIKËT E KANË NË LIBRAT E SHENJTË?
Joooo!! As që bëhet fjalë!!! Të njejtën bibël e themele kanë edhe orthodhoksët për nocionin e familjes e po aq të qartë e ka edhe Kur’ani nocionin martesë.
PO KU JANË KËTA?
Një aksiomë e lashtë sa bota thotë: “Kush hesht – pranon”. A e pranon në heshtje hirësia e tij Janullatos, kreu i orthodhoksëve shqiptarë martesën brenda të njejtit seks e më pas edhe birësimin e fëmijëve nga çiftet homoseksualë, si në spotin e shpërndarë nga LGBT shqiptarë? Po hirësia e tij, baba Mondi , udhëheqës i Kryegjyshatës Botërore? E në fund, por jo më i parëndësishmi:
Ç’MENDON KOMUNITETI MYSLIMAN SHQIPTAR?
Deri në këto çaste, që po shkruajmë këto rradhë: ASGJË!! E lashë për në fund këtë institucion pikërisht për shkak të veçantisë së tij. Është botërisht e pranuar se është institucioni fetar që përfaqëson shumicën e shqiptarëve. Mbase mund të mbyllë një sy, një vesh e të gjithë gojën për shumë çështje politike. Por për një ndryshim madhor në jetën edhe të këtij komuniteti, a ka kuptim heshtja? Si do të veprojë efendia kur të vijë një burrë me një burrë tjetër përdore në xhami për të falur namazin? Nuk po thotë kush të ngrerë besimtarët në protestë, siç bëri dje Erion Veliaj, por një prononcim, një qëndrim zyrtar, lidhur me këtë revolucion në konceptin e njërit prej institucioneve më të rëndësishme të shoqërisë, familjes, është detyrë!
MOS KANË FRIKË SE PËRZJEHET FEJA NË PUNËT E SHTETIT?
Pa merak! Në nenin 10 të kësaj kushtetute që ende kemi , në pikën 2 përcaktohet: “Shteti është asnjanës në çështjet e besimit e të ndërgjegjes dhe garanton lirinë e shprehjes së tyre në jetën publike“. Pra, edhe nëse përveç Allahut, ka frikë edhe “rilindjen” KMSH – ja, ligji themeltar i shtetit ia garanton shprehjen e asaj që mendon. Edhe po s’besoi në këtë ligj, ja, ka katolikët. Jo vetëm në këtë rast, por sa herë që kanë shprehur qëndrime a mospëlqime, s’i ka gjetur gjë.
Natyrisht që pushteti do të bëjë të vetën. Ka edhe gurin edhe arrën për të miratuar çdo ligj e ndryshuar çdo parim. Por kur institucionet themelore të moralit dhe jetës shpirtërore heshtin përulësisht para një shteti ua çbën nën hundë qëllimin e vet ekzistencës së këtyre bashkësive fetare atëhere. /Civitas/
