Ka më pak se një vit në Ministrinë për Evropën dhe Punët e Jashtme, por i ka mjaftuar për të arritur në përfundimin se diplomacia shqiptare ka çaluar në 5 vitet e fundit. Ministri në detyrë në Ministrinë për Evropën dhe Punët e Jashtme, Gent Cakaj, ka paralajmëruar të tjera shkarkime në institucionin që është ngarkuar të drejtojë.
“Nëse për 5 vite ka pasur punë të zellshme nuk ka nevojë për përmirësime? Jo. Kjo nuk qëndron. Me thoni ju nëse unë duhet të jem thjesht repredikuesi pasiv i një politike që ka ekzistuar deri tash? Jo unë jam pjesë e trashëgimisë së asaj ministrie sepse kam shërbyer edhe si zv/ministër, por po ashtu jam i gatshëm të thelloj reformat dhe të ndërmarr veprime të guximshme, të cilat nuk janë cenim i punës, por parashtrojnë kushtet objektive që të rinjtë dhe të reja e këtij vendi me rezultate të shkëlqyeshme të bëhen pjesë e diplomacisë”, tha Cakaj.
LEXO EDHE: Hajdari replika për diplomatët, Gent Cakaj: Je opozitare konstruktive
I thirrur në Komisionin e jashtëm për të folur për integrimin e Shqipërisë në Bashkimin Evropian, ministri në detyrë Gent Cakaj i duhej të sqaronte opozitën e re në këtë komision se ndryshimet janë të domosdoshme në institucionin që i është ngarkuar nga kryeministri që ta drejtojë.
“Për një pjesë prej tyre është shkëputur për shkak se me sjelljen e tyre kanë tejkaluar sjelljen dinjitoze të diplomatit. Për një pjesë prej tyre ka probleme të evidentuara me sjelljen e tyre dhe për pasojë ka masa disiplinore dhe për një pjesë të tyre thjesht kanë qëndruar në sistem tepër gjatë dhe kanë pasur kontribut tepër pak për të merituar vazhdimin mëtejmë në shërbimin diplomatik të shtetit shqiptar”, tha ai.
Por për ish-ministren e Jashtme, Arta Dade deklaratat e Cakajt janë antiligjore dhe nuk kanë ndodhur ndonjëherë më parë.
“Legjislacioni e përcakton qartë se çfarë detyrash ka zëvendësministri, dhe për rrjedhojë ligjërimi i tij lidhur me kërcënimin apo informim në media, nuk besoj që ka ndodhur ndonjëherë që lëvizjet në rastin konkret të diplomatëve të behën duke u dhënë paralajmërim përmes mediave. Ka ndodhur me kryeministrin në fillim të këtij mandati në një takim me ambasadorë, të cilët kanë qenë emërtesa e vetë kryeministrit lidhur me nxitjen për të pasur një diplomaci më efektive nga ana ekonomike, ai bëri disa deklarata në mënyrë arrogante dhe pas kësaj nuk vumë re asnjë lëvizje nga ana e ambasadorëve që janë nën autoritetin e kryeministrit. Këto deklarata pikë së pari janë antiligjore, pasi ministria e Jashtme e ushtron aktivitetin sipas ligjit”, thotë zonja Dade.
Dhe në fakt sipas ligjit “Për Shërbimin e jashtëm të Republikës së Shqipërisë” vendimet merren nga ministri i Jashtëm dhe jo nga zëvendës ministri. /Opinion.al
